Қазақстан Республикасы Жоғарғы Сотының төрағасы Асламбек Мерғалиев Алматы облысы соттарының өкілдерімен жүздесті.
Жиынға облыс әкімі Марат Сұлтанғазиев те қатысып, аймақтың дамуында мемлекеттік органдардың алатын ерекше орнын атап өтіп, атқарған жұмыстарына тоқталды. Айтуынша, Мемлекет басшысы Қасым-Жомарт Тоқаевтың тапсырмасына сәйкес, Алматы облысында сот тәртібі арқылы 201,8 мың гектар пайдаланылмай жатқан ауыл шаруашылығы жері мемлекет меншігіне қайтарылған. Сонымен қатар өңірде сотқа жүгіну нәтижесінде 696 борышкерден көлік құралдарын бастапқы тіркеу кезінде төленбеген 2,2 млрд теңге берешек өндірілген.
«Қазіргі таңда сот жүйесінің қызметін материалдық-техникалық тұрғыдан нығайту мақсатында облыстық сот ғимаратының құрылысы басталуда. Сондай-ақ ауданаралық мамандандырылған соттарды облыс орталығында шоғырландыру бағытында арнайы әкімшілік ғимарат сатып алу үшін бюджеттен 1,8 млрд теңге қаражат бөлінді. Осы жылдың маусым айында сатып алу жоспарлануда. Бұл сот жүйесінің тиімділігін арттырып, оның үздіксіз әрі сапалы жұмыс істеуіне оң ықпал етеді», – деді Марат Елеусізұлы.
Жиын барысында сот жүйесінің алдында тұрған міндеттер талқыланып, атқарылған істер сараланды.
Гүлзат БАЙҚОНЫСОВА
