Қонаев қалалық кітапханасында «Сыбайлас жемқорлық мәселелері бойынша бағдарламалық құжаттардың жобасына негізгі тәсілдерді әзірлеу» тақырыбында дөңгелек үстел өтті. Жиынға ҚР Мемлекеттік қызмет істері агенттігі Алматы облысы бойынша департаментінің басшысы Нұрсұлтан Сейдалиев, қоғамдық ұйым өкілдері мен ардагерлер қатысты.
Шараны ашып, жүргізген Нұрсұлтан Сейдалиев елімізде сыбайлас жемқорлыққа қарсы саясаттың жаңа кезеңге қадам басып отырғанын атап өтті. «Елімізде сыбайлас жемқорлыққа қарсы күрес белгілі бір жетістіктерге жеткенімен, бұл мәселе толық шешімін таппады. Әлі де болса сыбайлас жемқорлықтың көріністері орын алуда. Соның бірі күнделікті өмірде кездестіретін тұрмыстық сыбайлас жемқорлық. Яғни, оған ауруханалардағы, білім ошақтарындағы, жергілікті лицензиялау, полиция және салық органдарындағы парақорлық жатады. Биыл – 2022-2026 жылдарға арналған тұжырымдаманы қорытындылайтын кезең. Осыған байланысты жаңа бағдарламалық құжаттың жобасы әзірленіп жатыр. Бүгінгі басқосу – сол құжаттың мазмұнын нақтылап, сапасын арттыруға бағытталған маңызды алаң», – деді ол.
Жүздесуде Нұрсұлтан Ақылбекұлы сыбайлас жемқорлыққа қарсы саясатты жетілдірудің басым бағыттарына кеңінен тоқталды. «Біз бүгінде «Әділетті Қазақстан» құру жолында жүйелі реформаларды жүзеге асырып келеміз. Осы ретте сыбайлас жемқорлыққа қарсы саясаттың негізінде заң үстемдігі, ашықтық пен есептілік қағидаттары жатуға тиіс. «Заң мен тәртіп» тек мемлекеттік органдардың емес, бүкіл қоғамның өмірлік ұстанымына айналуы қажет. Алдағы кезеңге арналған құжат жобасы сыбайлас жемқорлыққа қарсы саясаттың жаңа бағытын айқындайтын стратегиялық негіз болмақ. Оны әзірлеу барысында қоғам пікірі, сарапшылар ұсыныстары және өңірлердің тәжірибесі міндетті түрде ескерілуге тиіс. Бүгінгі талқылау – осы бағыттағы маңызды қадам», – деді ҚР Мемлекеттік қызмет істері агенттігі Алматы облысы бойынша департаментінің басшысы Нұрсұлтан Сейдалиев.
Жиын барысында қатысушылар еркін пікір алмасып, сыбайлас жемқорлықтың алдын алу, тәуекелдерді азайту және қоғамдық бақылауды күшейту бойынша ұсыныстарын ортаға салды. Кездесу қорытындысында айтылған ұсыныстар алдағы уақытта қабылданатын бағдарламалық құжат жобасын жетілдіруге негіз болатыны атап өтілді.
Ерзат АСЫЛ
