«Жігер-М» мүгедек спортшылар федерациясы өкілдерінің тағы да мерейі үстем болды. Бұл жолы олар Алматы облысының құрамасы сапында Тараз қаласында өткен Қазақстан Республикасының параармрестлинг чемпионатына қатысып, бірінші орынды иеленді.
Ауқымды спорттық шараға 15 облыс пен республикалық маңызы бар екі қаладан, соның ішінде Астана мен Шымкенттен шамамен 300 спортшы бақ сынады. Финалда Жамбыл және Алматы облыстарының спортшылары бәсекеге түсті. Жарыс қорытындысы бойынша жерлестеріміз жеңіске жетті. Сөйтіп команда қоржыны 19 алтын, 16 күміс және 10 қола медальмен толықты. Жамбыл облысының спортшылары екінші орынды иеленді, ал Маңғыстау облысының командасы үшінші орынға тұрақтады.
Қарасайлық спортшылар өздеріне ыңғайлы, әдемі әрі сапалы спорттық киіммен қамтамасыз еткен «ORLEU GROUP» ЖШС басшылығына алғыс айтты. Сондай-ақ олар жаттығу кезінде де, жарысқа баруды ұйымдастыруда да тұрақты қолдау көрсеткені үшін «Дельфин» спорт кешенінің басшысы Алмас Жұмабековке ризашылығын білдірді.
Қуат Қайранбаев
Қарасай ауданы
