Облыстық әкімдікте облыс әкімінің бірінші орынбасары Қанат Есболатовтың төрағалығымен мемлекеттік органдардың нашақорлыққа және есірткі бизнесіне қарсы іс-қимылға бағытталған ведомствоаралық штабтың отырысы өтті. IІ тоқсанға арналған алғашқы жиында жасөспірімдер арасында нашақорлықтың, маскүнемдiк пен темекi шегудiң алдын алу бойынша атқарылып жатқан жұмыстар сараланды.
Алғашқы болып облыстық полиция департаменті есірткі қылмысына қарсы іс-қимыл басқармасының бастығы Дастан Жексенбеков есеп берді. Ол биыл мамыр айына дейін есірткіге қатысы 84 құқықбұзушылық анықталып, оның 39-ы қылмыс ретінде тіркелгенін, 109 кг есірткі затының тәркіленгенін атап өтті. Өз сөзінде Дастан Маратұлы жоспар шеңберінде полиция департаментінің есірткі қылмысына қарсы іс-қимыл басқармасы қызметкерлері оқушылар арасында нашақорлық пен есірткі қылмысының алдын алу бойынша тұрақты негізде жұмыс жүргізіп жатқанын жеткізді. Ол жыл басынан бері нашақорлыққа қарсы 582 профилактикалық іс-шара өткізілгенін тілге тиек етті. «PARYZ ЕРІКТІЛЕРІ» жастар қоғамдық бірлестігін тарту арқылы 84 іс-шара өткізіліп, наркосайттарды жарнамалайтын 170-тен астам жазба жойылған. Оқу процесі кезінде студенттік жатақханаларда кинологиялық қызметпен бірлескен рейд жүргізілген. Сонымен қатар жергілікті полиция қызметімен бірге кәмелетке толмағандар арасында құқықбұзушылықтың, нашақорлықтың, есірткі қылмысының алдын алу және қауіпсіздікті қамтамасыз ету мәселелері бойынша ата-аналармен кездесулер өткізілген.
Облыстық денсаулық сақтау басқармасы басшысының уақытша міндетін атқарушы Ләйла Серікбаеваның мәлімдеуінше, бүгінде облыстағы уақытша бейімдеу және детоксикация орталықтарында 2705 адам есепте тұса, оның ішінде 295 адамға нашақорлық диагнозы қойылған. Қазір аталған орталықтарда есірткі, психотроптық заттар мен алкогольді тұтынуға жол бермеу бойынша профилактикалық жұмыстар тұрақты жүргізіліп келеді. Нарколог, валеолог, психолог мамандардың қатысуымен оқу орындарында, Мәдениет үйлерінде дәріс сабақтары, семинар-тренингтер, түрлі дөңгелек үстелдер өткізіліп, нашақорлықтың зияны туралы ақпараттық үнпарақтар таратылады.
Келесі кезекте облыстық білім басқармасы басшысының орынбасары Ақмарал Әтенбекованың есебі тыңдалды. «Облыстағы 447 жалпы білім беретін мектепте және колледждерде жасөспірімдер арасында нашақорлықтың, маскүнемдіктің, темекі шегудің алдын алу бойынша 7920 профилактикалық іс-шара өткізіліп, оған 264 500 жасөспірім мен 68 000-нан астам ата-ана қамтылған. Тәуекел тобына жататын 4 860 оқушымен жеке профилактикалық жұмыс жүргізіліп, педагог-психологтар тарапынан 9 300 жеке кеңес беру ұйымдастырылды. Кешкі уақытта полиция департаментімен бірлескен «Түнгі қаладағы балалар» профилактикалық шарасы ұйымдастырылды. Оған білім беру ұйымдарының педагогтерімен қатар медицина қызметкерлері және құқық қорғау органдарының өкілдері тартылды. Ведомствоаралық өзара іс-қимыл жасөспірімдер арасында зиянды әдеттердің алдын алу жұмыстарының тиімділігін арттырып, кешенді көзқарасты қамтамасыз етуге мүмкіндік берді, – деді Ақмарал Бақытқызы.
Аталған ведомствоаралық штабтың отырысында облыстық ішкі саясат басқармасы башысының орынбасары Әсел Жалғасбаева «Нашақорлықтың алдын алу және есірткі қылмысына қарсы іс-қимыл мәселелері» бойынша атқарылып жатқан ақпараттық жұмыстарды баяндады. Оның айтуынша, ақпараттық кеңістікте есірткі жарнамасының таралуына жол бермеу мақсатында жүйелі жұмыстар жүргізілуде. Бұл бағыттағы іс-шараларға еріктілер, үкіметтік емес ұйымдар мен қоғам белсенділері тартылған. «Жыл басынан бері облыстық Qonaev TV телеарнасы мен өзге де мерзімді басылымдарда нашақорлықтың алдын алуға бағытталған 300-ден астам ақпарат жарық көріп, арнайы дайындалған бейнеүзінділер көрсетілді. Үкіметтік емес ұйымдардың қатысуымен білім беру және денсаулық сақтау мекемелерінде, әскери бөлімдер мен жастар арасында кездесу, дөңгелек үстел, акциялар мен өзге де тақырыптық шаралар ұйымдастырылды» – деді ол.
Жиынды қорытындылаған облыс әкімінің бірінші орынбасары Қанат Есболатов нашақорлық пен есірткі қылмысы қоғамдағы өзекті мәселелердің бірі болғандықтан, оны ауыздықтау тек құқық қорғау органдарының ғана міндеті емес, баршаға ортақ іс екенін айтты.
– Соңғы кездері жасөспірімдер мен жастар арасында синтетикалық есірткінің таралу деңгейі артуда. Есірткі қылмысы жасарып келеді, жаңа психобелсенді заттар интернет арқылы оңай қолжетімді болуда, – деген Қанат Болатұлы полиция департаментіне есірткі заттарын сатып алғандардың қаншауы жасөспірім екенін анықтауда білім беру мекемелерімен бірлесе жұмыс істеп, басқа да тұтынушылардың санаттары бойынша зерделеуді, статистикалық мәліметтерден гөрі, жағдайға шынайы талдау жасап, нақты нәтижені көздеуді міндеттеді.
Ерзат АСЫЛ
