Бүгін Алматы облысының әкімі Іле ауданына арнайы келіп, Ұлы Отан соғысының ардагері Тәңірберген Толғанбаевқа Мемлекет басшысы Қасым-Жомарт Тоқаевтың құттықтауын жеткізді.
Ғасыр жасаған майдангердің өмір жолы — тұтас ел тарихымен сабақтас.
Тәңірберген Толғанбаев 1923 жылы 1 мамырда Алматы облысы Ақсу ауданында дүниеге келген. 1942 жылы әскер қатарына шақырылып, Армениядағы арнайы дайындықтан кейін шекара қызметінде еңбек етті. Сталинград азат етілгеннен кейін теміржол бойындағы стратегиялық аймақта әскери міндетін жалғастырды.
Соғыстан кейін бейбіт өмірге араласып, құқық қорғау саласында ұзақ жыл абыройлы қызмет атқарды. Аудандық ішкі істер бөлімінен бастап, Жамбыл аудандық ішкі істер бөлімінің басшысы, Іле ауданында прокурорлық қызметтерде болды.
Өмірін ел қауіпсіздігі мен заң саласына арнаған ардагер ондаған мемлекеттік марапаттар мен мерейтойлық медальдардың иегері. Олардың қатарында ІІ дәрежелі Отан соғысы ордені, «Маршал Жуков» белгісі және КСРО ІІМ-нің үздік қызмет марапаттары бар.
Бүгінгі кездесу — бір адамның тағдырын емес, бүтін бір ұрпақтың ерлігіне көрсетілген құрмет.
Майдангердің өнегелі ғұмыры — елге қызмет етудің, антына адал болудың және Отанға деген шексіз сүйіспеншіліктің символы.
