Облыс әкімі Марат Сұлтанғазиев Жамбыл ауданының Ұзынағаш ауылында тұратын Ұлы Отан соғысының ардагері Федор Ковалевтің шаңырағына арнайы барып, Жеңіс күнімен құттықтады.
Өңір басшысы ардагерге Қазақстан Президенті Қасым-Жомарт Тоқаевтың арнайы құттықтау хатын табыстап, майдангердің ел алдындағы ерен ерлігі мен бейбіт өмір жолындағы еңбегіне құрмет көрсетті.
Федор Мелянович 1927 жылы Могилев облысында дүниеге келген. 1944 жылы әскер қатарына шақырылып, арнайы дайындықтан өткен соң 1945 жылы кеңес-жапон соғысына қатысқан. Майдан даласында батылдығымен танылған ардагер соғыстан кейін туған жерінде еңбек етіп, кейін Жамбыл ауданына қоныс аударған. 1969 жылдан бастап Ұзынағаш ауылында еңбек етіп, ұзақ жылдар Жамбыл РТС мекемесінде электр дәнекерлеуші қызметін атқарды. Еңбектегі табыстары үшін бірнеше мәрте Құрмет грамоталарымен және бағалы сыйлықтармен марапатталған. Майдандағы ерлігі үшін ІІ дәрежелі орденмен, мерейтойлық медальдармен және Г.К. Жуковтың 100 жылдығына арналған медальмен марапатталған. Жамбыл ауданының Құрметті азаматы.
Жүздесу барысында бейбіт өмірдің қадірі, ел бірлігі мен ұрпақтар сабақтастығы жайлы тағылымды әңгіме айтылып, майдангерге ізгі тілек арналды. Ұлы Жеңістің рухы мен майдангерлердің ерлігі – кейінгі ұрпақ үшін мәңгілік өнеге. Ардагердің үйіне аудан әкімі Нұрлан Ертас бірге барып, сый-құрмет көрсетті.
Серік САТЫБАЛДИЕВ
Жамбыл ауданы
