Қазіргі таңда интернет пен цифрлық технологиялар күнделікті өміріміздің ажырамас бөлігіне айналды. Онлайн сауда жасау, банк қызметтерін пайдалану, мемлекеттік қызметтерді алу және әлеуметтік желілер арқылы байланысу – барлығы интернет арқылы жүзеге асуда. Алайда цифрлық мүмкіндіктердің артуымен қатар интернет-алаяқтық қылмыстары да көбейіп келеді.
Алатау қаласында да тұрғындардың қаржылық қауіпсіздігін қамтамасыз ету және интернет-алаяқтықтың алдын алу бағытында түсіндіру жұмыстары тұрақты түрде жүргізілуде. Алаяқтар түрлі айла-тәсілдерді қолданып, азаматтардың жеке деректері мен банк карталарының мәліметтерін заңсыз иемденуге тырысады.
Ең жиі кездесетін алаяқтық түрлеріне жалған интернет-дүкендер, банк қызметкері ретінде хабарласу, әлеуметтік желілер мен мессенджерлер арқылы күмәнді сілтемелер жіберу, жеңіл несие рәсімдеп беру немесе инвестициялық жобаларға ақша салуға үгіттеу жатады. Кейбір жағдайларда алаяқтар өзін құқық қорғау органдарының немесе мемлекеттік мекемелердің қызметкері ретінде таныстырып, азаматтарды алдап соғуға әрекет етеді.
Мамандар тұрғындарға келесі қауіпсіздік шараларын сақтауға кеңес береді:
• Банк картасының нөмірін, CVV кодын және SMS арқылы келген құпия кодтарды ешкімге бермеу;
• Күмәнді сілтемелерге өтпеу;
• Белгісіз тұлғаларға ақша аудармау;
• Интернет-дүкендердің сенімділігіне көз жеткізу;
• Әлеуметтік желілердегі жалған акциялар мен ұтыс ойындарына сақтықпен қарау;
• Қосымша қауіпсіздік үшін екі факторлы аутентификацияны пайдалану.
Егер сіз алаяқтық әрекетке тап болсаңыз немесе күмәнді қоңырау мен хабарлама алсаңыз, дереу құқық қорғау органдарына немесе банкке хабарласқан жөн.
Интернет қауіпсіздігі – әр азаматтың жауапкершілігі. Алатау қаласының тұрғындарын қырағылық танытып, жеке деректерін қорғауға және ақпараттық қауіпсіздік талаптарын сақтауға шақырамыз. Бірлескен сақтық қана интернет-алаяқтардың құрбаны болудан сақтайды.
Заң мен тәртіп – қауіпсіз қоғамның кепілі!