Қазіргі цифрлық дәуірде интернет технологиялары күнделікті өміріміздің ажырамас бөлігіне айналды. Онлайн қызметтерді пайдалану, электронды сауда жасау және әлеуметтік желілер арқылы қарым-қатынас орнату жеңілдеген сайын интернет-алаяқтықтың да түрлері көбейіп келеді. Сондықтан интернет кеңістігіндегі қауіпсіздік мәселесі бүгінгі қоғам үшін аса маңызды болып отыр.
Осыған орай Алатау қаласында интернет-алаяқтықтың алдын алу бағытында жүйелі ақпараттық-түсіндіру жұмыстары жүргізілуде. Қала тұрғындарының цифрлық сауаттылығын арттыру және киберқауіпсіздік мәдениетін қалыптастыру мақсатында кездесулер, түсіндіру акциялары мен ақпараттық науқандар ұйымдастырылуда.
Тұрғындар арасында жүргізіліп жатқан түсіндіру жұмыстары барысында банк карталарының деректерін бөгде адамдарға бермеу, күмәнді сілтемелерге өтпеу, белгісіз нөмірлерден түскен қоңыраулар мен хабарламаларға сақтықпен қарау қажеттігі кеңінен түсіндірілуде. Сонымен қатар әлеуметтік желілер мен мессенджерлер арқылы таралатын жалған ақпараттар мен алаяқтық схемалардан қорғану жолдары туралы ақпараттар берілуде.
Бүгінде алаяқтар өздерін банк қызметкерлері, құқық қорғау органдарының өкілдері немесе түрлі ұйымдардың мамандары ретінде таныстырып, азаматтардың жеке деректерін алуға тырысады. Сондықтан әрбір азамат жеке мәліметтерінің құпиялылығын сақтауға ерекше мән беруі тиіс.
Интернет-алаяқтықтың алдын алуда құқық қорғау органдарының жұмысы маңызды болғанымен, тұрғындардың қырағылығы мен жауапкершілігі шешуші рөл атқарады. Әр азамат қауіпсіздік талаптарын сақтап, күмәнді әрекеттер туралы тиісті органдарға хабарлаған жағдайда ғана мұндай құқық бұзушылықтардың алдын алуға болады.
Алатау қаласының қоғамдық пікір көшбасшысы ретінде қала тұрғындарын интернет кеңістігінде сақ болуға, жеке деректерін қорғауға және цифрлық қауіпсіздік талаптарын қатаң сақтауға шақырамын. Интернеттегі қауіпсіздік – әрқайсымыздың ортақ жауапкершілігіміз.
Тек бірлескен әрекет пен жоғары цифрлық сауаттылық арқылы ғана интернет-алаяқтыққа тосқауыл қойып, қауіпсіз қоғам қалыптастыра аламыз.
Саурбаева Риза Санаққызы Алатау қаласының қоғамдық пікір көшбасшысы