Маскүнемдік – адам денсаулығына, отбасының берекесіне және қоғамның тұрақтылығына үлкен қауіп төндіретін әлеуметтік мәселе. Алкогольді ішімдіктерді шамадан тыс пайдалану адамның денсаулығына зиян келтіріп қана қоймай, оның мінез-құлқына, еңбекке қабілеттілігіне және айналасындағы адамдармен қарым-қатынасына кері әсер етеді.
Статистика көрсеткендей, көптеген құқық бұзушылықтар мен жол-көлік оқиғалары алкогольдік ішімдік ішкен күйде жасалады. Сонымен қатар, отбасындағы жанжалдардың, тұрмыстық зорлық-зомбылықтың және балалардың қараусыз қалуының негізгі себептерінің бірі – маскүнемдік.
Алкогольді тұрақты пайдалану бауыр, жүрек-қан тамырлары ауруларының дамуына, жүйке жүйесінің бұзылуына және психологиялық тәуелділікке алып келеді. Мұндай тәуелділік адамның өмір сапасын төмендетіп, оның қоғамнан оқшаулануына себеп болуы мүмкін.
Маскүнемдіктің алдын алу үшін салауатты өмір салтын насихаттау, спортпен шұғылдану, жастар арасында түсіндіру жұмыстарын жүргізу және отбасылық құндылықтарды дәріптеу маңызды. Әрбір азамат өз денсаулығына жауапкершілікпен қарап, зиянды әдеттерден аулақ болғаны жөн.
Қоғамның қауіпсіздігі мен әл-ауқаты әр адамның саналы таңдауынан басталады. Сондықтан маскүнемдікке қарсы күрес – баршамыздың ортақ міндетіміз.