Азаматтардың жеке меншігін қорғау – құқықтық мемлекеттің басты міндеттерінің бірі. Әрбір адамның адал еңбегімен тапқан дүниесі заңмен қорғалады. Сондықтан мүлікті сақтау мен оған қатысты құқық бұзушылықтардың алдын алу – қоғам үшін маңызды мәселе.
Соңғы жылдары пәтер ұрлығы, қалта ұрлығы, автокөлікке қатысты қылмыстар және алаяқтық әрекеттердің түрлі тәсілдері кездесіп отыр. Мұндай жағдайлардың алдын алу үшін тұрғындардың сақтығы ерекше маңызға ие. Үйден шығарда есік-терезенің жабық екеніне көз жеткізу, сенімді құлыптар мен бейнебақылау жүйелерін пайдалану, бағалы заттарды қараусыз қалдырмау – қарапайым болғанымен тиімді сақтық шаралары.
Көп жағдайда қылмыскерлер әлеуметтік желілердегі ашық ақпаратты пайдаланады. Демалысқа кеткеніңізді немесе үйде ешкім жоқ екенін жариялау ұрылардың назарын аударуы мүмкін. Сондықтан жеке өмірге қатысты ақпаратты жариялауда абай болған жөн.
Егер мүлкіңізге қатысты құқық бұзушылық орын алса, уақыт жоғалтпай құқық қорғау органдарына хабарлау қажет. Жедел әрекет ету қылмысты тез ашуға және келтірілген шығынды өтеуге мүмкіндік береді.
Жеке меншікке құрмет – заңға құрметтің белгісі. Әр азамат өз мүлкін қорғауға жауапкершілікпен қарап, қауіпсіздік ережелерін сақтаған жағдайда құқық бұзушылықтардың саны да азая түседі.
Тоғжан ЖОЛДЫҒАЛИ