Алматы облысы – ел тарихында өзіндік орны бар, қай кезде де қоғамдық ойдың, руханият пен мәдениеттің мәйегі болған қасиетті өңір. Ел өміріндегі елеулі өзгерістер мен маңызды бастамаларға үн қосу, қоғамның өзекті мәселелеріне бейжай қарамау – Алатау өңірінің ежелден қалыптасқан азаматтық болмысы.
Осы белсенділіктің алдыңғы сапында әрдайым қаламгерлер қауымы жүрді. Халықтың сөзін сөйлеп, елдің мұңын мұңдап, мемлекеттің мүддесін жырлаған ақын-жазушылардың үні талай тарихи кезеңде жұртшылықтың ой-санасына қозғау салды.
ХІХ ғасырдағы Жетісу жыршылары мен ойшылдарының, ХХ ғасырдағы қаламгерлердің, тәуелсіздік дәуіріндегі ақын-жазушылардың шығармашылығына көз салсақ, олардың қаламы қашанда елдік мәселелермен сабақтас болғанын көреміз. Сүйінбайдың отты жыры, Жамбылдың азаматтық үні, Ілияс Жансүгіровтің ел мен жер тағдырын толғаған поэзиясы, Мұхтар Әуезов бастаған ұлт руханиятының биік мектебі – осының айқын дәлелі. Әр дәуірдің өз үні болғанымен, мұрат бір еді – елдің еңсесін көтеру, халықтың сөзін айту, мемлекеттің мерейін биіктету.
«Елдің сөзі – ердің сөзі», – дейді халқымыз. Бүгінгі таңда сол елдік сөзді нақты азаматтық ұстаныммен жалғастыру – баршамызға ортақ жауапкершілік.
23 тамызда өтетін Құрылтай депутаттарын сайлау – елдің ертеңіне қатысты маңызды таңдау. Бұл – жай ғана дауыс беру емес, халықтың өз ойын білдіруі, ел болашағына деген азаматтық көзқарасын танытуы.
Құрылтай – қоғамның түрлі саласында жүрген азаматтардың басын қосып, елдің көкейіндегі мәселелерді талқылайтын маңызды алаң. Сондықтан оған елдің сөзін сөйлейтін, халықтың мұң-мұқтажын білетін, мемлекет мүддесін биік қоятын азаматтарды таңдау – баршамыздың ортақ парызымыз.
«Бірлік бар жерде – тірлік бар», – дейді дана халқымыз. Ал елдік мәселеде енжарлыққа орын жоқ. Әрбір азаматтың таңдауы – елдің ертеңіне қосылған үлес.
Сондықтан Қазақстан Жазушылар одағының Алматы облыстық филиалы өңір тұрғындарын 23 тамыз күні Құрылтай депутаттарын сайлауға белсенді қатысуға шақырады.
Өз таңдауымызды жасайық! Ел болашағына бейжай қарамайық.
Ел тағдырын сөзбен ғана емес, нақты азаматтық ұстаныммен бірге айқындайық! Өйткені елдің ертеңі – бүгінгі таңдаудан басталады.
Ержан ТОҚТАР, Қазақстан Жазушылар одағының
Алматы облыстық филиалының директоры