Алматы облысы Ұйғыр ауданының Шошанай ауылында жаңа спорт кешенінің ашылуына орай қазақ күресі мен шағын футболдан облыстық турнирлер өтті. Жаңа спорт нысаны алғашқы күннен-ақ спортшылардың жаттығуы мен жарысына толы болды. Ашылу салтанатында символикалық лента қиылып қана қоймай, бозкілемде балуандар белдесіп, футбол алаңында ысқырық үні естіліп, нағыз спорттық бәсеке қыза түсті.
Қазақ күресінен «Түйе палуан» санатындағы жарыста күш — жеңістің бір ғана құрамдас бөлігі екенін жақсы білетін спортшылар бозкілемге шықты. Мұнда күрес техникасы, төзімділік, тактикалық ойлау және шешуші сәтте сабыр сақтап, бар зейінді шоғырландыра білу де маңызды.
18 жастан асқан, салмағы 90 келіден жоғары палуандар абсолюттік салмақтағы «Түйе палуан» атағы үшін белдесті.
Ұйымдастырушылардың айтуынша, мұндай турнирлер жастардың ұлттық күреске деген қызығушылығын арттырып, ұрпақтан-ұрпаққа жалғасып келе жатқан спорттық дәстүрлерді дәріптеуге мүмкіндік береді.
Жарыс қорытындысы бойынша І орынды Еңбекшіқазақ ауданының өкілі Нұрғали Жолтаев иеленді.
ІІ орын — Кеген ауданының спортшысы Бексұлтан Анарұлына бұйырды.
ІІІ орын — Ұйғыр ауданының өкілі Фарух Сүлейменовке берілді.
«Қазақ күресі — бұл тек спорт емес, үлкен мінез мектебі. Мұнда қарсыласты құрметтеуді, берілмеуді және соңына дейін күресуді үйренесің. Осындай турнирлердің аудандарда ұйымдастырылып, спортшыларға өз мүмкіндіктерін көрсетуге жағдай жасалып отырғаны қуантады», — деді жарыс жеңімпазы Нұрғали Жолтаев.
Шағын футболдан өткен жарыстар да тартысты әрі көрерменге қызықты болды. Алаңда облыстың әртүрлі аудандарынан келген командалар кездесті.
Жоғары қарқын, жылдам шабуылдар, дәл пастар және әр доп үшін қызу күрес — ойындар шағын футболда жеке ойыншылардың физикалық дайындығы мен шеберлігі ғана емес, командалық үйлесімділіктің де маңызды екенін көрсетті. Мұнда нәтижені кейде санаулы секундтар шешеді: бір дәл пас, жылдам қарсы шабуыл немесе қақпашының сәтті ойыны матчтың барысын бір сәтте өзгертіп жіберуі мүмкін.
Турнир қорытындысы бойынша жүлделі орындар төмендегідей бөлінді:
І орын — Қарасай ауданы.
ІІ орын — Кеген ауданы.
ІІІ орын — Ұйғыр ауданы, Шонжы ауылдық округі.
Екі турнирдің де жеңімпаздары мен жүлдегерлеріне ақшалай сыйлықтар табысталды. Шағын футбол жарысының жалпы жүлде қоры 1,5 млн теңгені, ал қазақ күресінен өткен турнирдің жүлде қоры 1 млн теңгені құрады.
Жарыстар «Ұлағатты ұрпақ» жобасы аясында ұйымдастырылды. Жобаның негізгі мақсаты — өскелең ұрпаққа тек білім мен қажетті дағдыларды меңгерту ғана емес, сонымен қатар дұрыс өмірлік бағыт-бағдар беруге жағдай жасау.
Бұл ретте спорт — жас ұрпақты тәрбиелеудің ең тиімді құралдарының бірі. Ол тәртіпке баулып, ережені сақтауға, жауапкершілікке, командалық жұмысқа және алға қойған мақсатқа жетуге үйретеді.
«Ауылда заманауи спорт инфрақұрылымы пайда болған кезде, тек спорттық өмір ғана өзгермейді. Балалардың сабақтан кейін келіп, спорттың әртүрлі түрлерінен өздерін сынап көруге, пікірлес достар табуға және алдына мақсат қоюға мүмкіндігі артады. Біз осындай нысандардың күн сайын жұмыс істеп, тұрғындарға қолжетімді болғанын қалаймыз. Бұқаралық спорттың мәні де осында», — деді Алматы облысының дене шынықтыру және спорт басқармасы басшысының орынбасары Жансерік Әдиахметов.
Жаңа спорт кешенінің ашылуындағы ең басты нәтиже де осы болса керек. Өйткені үлкен спорт әрдайым үлкен ареналардан бастала бермейді. Кейде ол ауылдағы шағын спорт залынан, алғашқы жаттықтырушыдан, алғашқы жарыстан және өзіңді жақсырақ етуге деген алғашқы талпыныстан басталады.
Бүгін Шошанай ауылының тұрғындарына дәл осындай мүмкіндік беретін орын пайда болды. Бұл — спортқа алғашқы қадам жасауға, өз командаңды табуға және жеңістің дәмін сезінуге мүмкіндік беретін жаңа мекен.