Жол қозғалысы ережелерін сақтау – адам өмірі мен денсаулығын қорғаудың маңызды шарты. Жолдағы қауіпсіздік жүргізушілердің ғана емес, жаяу жүргіншілердің, жолаушылардың және велосипед пайдаланушылардың да жауапкершілігіне байланысты.
Жол-көлік оқиғаларының алдын алу үшін әрбір қатысушы жол ережелерін білуі және орындауы қажет. Жүргізушілер белгіленген жылдамдықты сақтап, қауіпсіз арақашықтықты ұстанып, көлік басқару кезінде телефонға алаңдамауы керек. Қауіпсіздік белдігін тағу және балаларды жасына сәйкес арнайы орындықта тасымалдау да маңызды.
Жаяу жүргіншілер жолды белгіленген жерден кесіп өтіп, бағдаршамның сигналдарына назар аударуы тиіс. Қараңғы уақытта жарық шағылыстыратын элементтерді пайдалану көрінуді арттыруға көмектеседі.
Ауа райының қолайсыз жағдайында, әсіресе жаңбыр, қар және көктайғақ кезінде, жол қозғалысына қатысушылар ерекше сақ болуы қажет. Жылдамдықты азайтып, басқа адамдардың әрекетін ескеріп отыру қауіптің алдын алуға мүмкіндік береді.
Балаларға жол ережелерін ерте жастан үйрету де аса маңызды. Отбасы мен білім беру ұйымдары қауіпсіз мінез-құлық дағдыларын қалыптастыруға бірлесе атсалысуы керек.
Жолдағы бір сәттік жауапсыздық орны толмас өкінішке әкелуі мүмкін. Сондықтан жол ережесін сақтау – өз өміріңді ғана емес, өзгенің өмірін де қорғау.
Жолда асықпаңыз, ережені сақтаңыз, өмірді бағалаңыз!
Тоғжан ЖОЛДЫҒАЛИ