Жамбыл ауданында малдың басым бөлігі жайлауға шығарылды. Түлік иелері мал-жанын тауға көшіруді маусымның басынан бастап, айдың аяғына дейін өздеріне тиесілі сай-салаға орналастырып болды.
Биылғы көктемнің жаңбырлы болуынан таудың шөбі қалың шықты. Жайылымы ауыстырылған түлік енді мұнда күзге дейін қоңданып, төлі де тез жетілетін болады. Жайлауға қоныстанғандардың қатарында көптеп мал ұстайтын жеке адамдар да, шаруа қожалықтары да бар.
– Аудандағы 24 ауылдық округтің 23-індегі шаруа қожалықтары мал шаруашылығымен айналысады. Соның ішінде 20 округтің тауда өз жайлаулары бар, малдары жазда сонда бағылады. Тек Күрті аймағындағы Айдарлы, Бозой, Сарытауқұм округтерінің ғана жайлауы жоқ. Себебі Күрті ауданы таратылғанда оның құрамындағы осы ауылдарға тиесілі болған Үшқоңырдың басындағы Нар жайлауы көрші ауданға өтіп кеткен, – дейді Жамбыл аудандық ауыл шаруашылығы бөлімінің бас маманы Дүйсеналы Еңкелешев.
Айтуынша, биыл 23 ауылдық округтегі 512 шаруа қожалығының малы жайлауға шығарылады деп жоспарланған болса, қазір соның барлығы дерлік өздеріне тиесілі түліктерін жазғы мекенге көшіріп үлгерді. Ауданда жайлауға шығарылатын малдың саны жылдан-жылға артып келеді. Оның себебі белгілі – шөбі шүйгін, ауасы салқын, суы тұнық тау бөктері төрт түліктің тез жетіліп, қоң жинауына аса қолайлы. Малшы қауымға да жайлау жайлы, әрі экономикалық жағынан да тиімді.
Шаруа қожалықтарында қолда бар малдың біраз бөлігі жылда жайлауда бағылады. Мәселен, бұл мезгілде сиырдың үштен бірі, қойдың тең жартысы, ал жылқының көбі тауда. Атақоныс атауларын атай кетсек, Ақтекше, Мұздысай, Аққолтық, Құлансаз, Майтөбе, Қарақия, Екіаша, Ақтасты, Әлмерек, Ойжайлау, Бұғымүйіз, Сәбден, Суықтөбе, Қоңыртөбе, Үлкенсаз, Кішісаз, Ботасаз, Көктөбе, Ұяжарған, Алаяқ, Сарысай жайлаулары деп кете береді. Жайлы қоныстардың сай-саласы қазір мыңғырған малға толы.
Серік САТЫБАЛДИЕВ
Жамбыл ауданы
