Жуырда Өзбекстанның Термез қаласында көкпардан өткен халықаралық жарысқа Алматы облысының «Алатау» командасы да қатысты. Өзбекстан Президентінің кубогі сарапқа салынған дүбірлі додада облыс намысын қорғаған «Алатау» көкпар командасы іріктеу сындарынан сүрінбей өтіп, финалда Қырғызстан құрама командасын 12:4 есебімен жеңіп, турнир жеңімпазы атанды.
Облыс әкімі Марат Сұлтанғазиев халықаралық жарыстан көрші мемлекет басшысының кубогін еншілеп оралған «Алатау» көкпар командасымен кездесті. Кездесуге Қазақстан Ұлттық спорт қауымдастығының президенті Исламбек Салжанов, облыстық дене шынықтыру және спорт басқармасының басшысы Нұрбақыт Теңізбаев пен бөлім басшысы Рахман Шахарбек, облыстық ұлттық спорт және ат спортын дамыту дирекциясының директоры Елдос Тілебалдиев, «Алатау» көкпар федерациясының президенті Сәбит Қасенов, көкпардан облыстың аға бапкері Саят Сыдырманов пен спортшылар қатысты.
Кездесуде Марат Елеусізұлы ұлттық спорт бай тарихымыз бен салт- дәстүріміздің негізгі нысаны екенін атап өтті.
– Ұлттық спортты дамытуға, насихаттауға бәріміз міндеттіміз. Осы мақсатта облыста ұлттық спорт түрлеріне ерекше көңіл бөлініп келеді. Спортшыларды түрлі деңгейдегі жарыстарға жіберу, дайындықтарын қамтамасыз ету және көптеген ірі жарыстарды өткізу сынды жұмыстар жоғары деңгейде жасалып жатыр. Бұған дәлел, күні кеше Термез қаласында өткен халықаралық турнирде Өзбекстан президентінің кубогін жеңіп алған айтулы жеңістеріңіз деп білемін, – деген облыс басшысы ұлттық спорт түрлерін дамытуға жоғары деңгейде қолдау көрсетілетін жеткізді.
Марат Сұлтанғазиев облыста ұлттық спорттың дамуына қосқан сүбелі үлесі мен Өзбекстан президенті кубогы турнирінде жоғары нәтиже көрсеткендері үшін «Алатау» көкпар федерациясының президенті Сәбит Қасеновке және команда бапкері мен спортшыларға облыс әкімінің Алғыс хатын табыстады.
Келесі кезекте еліміздің Ұлттық спорт қауымдастығының президенті Исламбек Салжанов сөз алып, өзінің сапары барысында осындай кездесуге қатысуын жақсылықтың нышанына балады. Исламбек Төлеубайұлы ұлттық спортты дамыту бағытында жүзеге асырылуы тиіс бірқатар мәселені облыс әкімі Марат Сұлтанғазиевпен талқылап, ақылдасқанын айтты.
Облыста көкпар спортын дамыту мақсатында 2021 жылы «Алатау» көкпар федерациясы құрылған. Федерация команданы аттармен, қажетті құрал-жабдықпен, спорт киімдерімен қамтамасыз етеді. Сондай-ақ, облыстағы ұлттық спорттың төрешілер корпусын құрып, төрешілердің біліктілік санат алуына жұмыс жасап жүр.
«Алатау» көкпар командасы 2022 жылы Қазақстан Республикасы 1-лигасының жеңімпазы атанған. 2022 жылдың қыркүйек айында Түркия мемлекетінде өткен бүкіләлемдік көшпенділер ойындарында ұлттық құрама сапында Мәді Сейділдә, Бақытжан Сайдолданов және Темірлан Сейтбеков 1- орын иеленген.
Айта кетейік, биыл II Азия чемпионаты қазан айында Ұйғыр ауданында өтеді деп жоспарланып отыр. Бұдан бөлек, шілдеде жасөспірімдер арасындағы аударыспақ пен теңге ілуден XI ҚР чемпионаты Талғар ауданында ұйымдастырылмақ. Мамыр айында жамбы атудан жастар арасындағы IX ҚР чемпионаты да Талғар ауданында өткізіледі.
Айжарық КӨПТІЛЕУОВ
