Қонаев қаласының “Home Club” демалыс аймағында “OCEANMAN Kazakhstan – 2024” ашық суда жүзуден Халықаралық жарыс басталды. Биылғы жылы қатысушылардың рекордтық саны тіркелді.
Спортшыларды қарсы алған Алматы облысының әкімі Марат Сұлтанғазиев “Oceanman” тек спорт мерекесі ғана емес, туристерге өңірдің тартымды жағын көрсету мүмкіндігі екенін атап өтті.
“Спортты дамытуға ерекше көңіл бөлініп келеді. Облыстың жарты миллионға жуық тұрғыны, халықтың 39,5 пайызы – спортшылар”, – деді әкім.
Италиядан Қазақстанға дейін: Oceanman алты құрлықтың басын қосады. Ол 2015 жылы Италия мен Испанияда халықаралық франчайзинг болып басталған. Бүгінгі таңда жарыс бүкіл әлемде өтеді, кәсіпқой, әуесқой жүзушілерді жинайды. Ұйымдастырушылар қатысушылардың деңгейіне қарай әр түрлі қашықтықты қарастырған. Жаңадан бастаушылар 1 шақырымға, тәжірибелі спортшылар 10 шақырымға жүзеді.
“Oceanman Kazakhstan тіркелген қатысушылар саны бойынша соңғы үш жылдағы рекордты орнатты”, – деді бас ұйымдастырушы, Oceanman Kazakhstan франшизасының иегері Ералы Оралов.
Биыл жүзуге Ресей, Қырғызстан, Өзбекстан, Еуропа, Азия және Австралияны қоса алғанда, әлемнің 17 елінен 2600-ден астам жүзуші қатысады. Жарысқа қатысушылардың ең жасы 7 – де болса, ең қарты 70-те.
“Бүгін осы шараға куә болу үшін 3000-нан астам адам жиналды. Дәл осындай ауқымды оқиғалар жоғары дәрежелі спортшыларды дайындап тәрбиелейді, сондай-ақ облыста да, елде де спорт пен туризмді дамыту үшін қосымша серпін болады”, – деді Алматы облысының әкімі Марат Сұлтанғазиев.
Бірінші жарыс күні 10 және 5 шақырымға жүзу өтті. Ең танымалы – 450 адам қатысқан Half oceanman (5 шақырым) қашықтығы болды.
Жарыстың екінші күні қатысушыларды “SPRINT”, “OCEANTEAMS” және “OCEANKIDS” (7-14 жас аралығындағы балалар үшін) қашықтықтары күтеді.
