Қазақстанда жанармай бағасы қымбаттауының инфляцияға тікелей әсері айтарлықтай болмайды. Бұл туралы бүгін үкімет жиынынан соң Қазақстан Прмеьер-министрі Әлихан Смайылов мәлімдеді.
«Жанармай бағасының қымбаттауы инфляциялық үрдістерге де белгілі бір ықпалын тигізеді. Тікелей ықпалына келер болсақ, жан басына шаққанда тұтынушылық себетіндегі дизель отынының орташа үлесі 0,4 пайыз, ал АИ-92 маркалы бензиннің үлесі 2 пайыз. Осы себепті жалпы инфляция деңгейіне 0,35 пайыз шамасында ықпал етеді», – деді Смайылов.
Премьер-министр бұған қоса жанармай қымбаттауының жанама әсері болатынын да айтты.
«Дизель отыны мен бензин өндірушілердің шығындары құрамына енетіндіктен, белгілі бір мультипликативті әсері де болады. Бірақ Мемлекет басшысы жылдың соңына дейін инфляция деңгейін екі есеге азайтуға тапсырма берді. Сондықтан үкімет инфляциялық үрдістерді тежеудің жедел әрі жүйелі шараларын қабылдайды», – деді Әлихан Смайылов журналистерге.
Премьердің айтуынша, наурыз айының қорытындысы бойынша инфляция қарқыны айтарлықтай баяулаған, яғни ақпанда жылдық инфляция 21,3 пайыз болса, наурызда 18,1 пайыз болған. Әлихан Смайылов үкімет инфляцияны тежеуге бағытталған кешенді шараларды одан ары белсенді іске асыра беретінін айтады.
3 сәуірде энергетика министрінің міндетін атқарушы Болат Ақшолақов елде 12 сәуірден бастап бензин мен дизель отынының бағасы қымбаттайтынын мәлімдеген. Үкіметтің есебінше АИ-92 және АИ-93 маркалы бензиннің литрі қазіргі 182-187 теңгеден 205 теңгеге, дизель отынының бағасы 230-260 теңгеден 295 теңгеге көтеріледі. Ақшолақов жанармайдың қымбаттауына ел аумағынан транзитпен өтетін көліктердің жанармайға деген сұранысының артуы және жанармайдың көрші елдерге астыртын жолмен шығарылуы негізгі себеп болып отырғанын айтқан.
