Бензин мен дизель отыны бағасының көтерілуі азық-түлік бағасына айтарлықтай әсер етпейді деп мәлімдеді бүгін Премьер-министрдің орынбасары – сауда және интеграция министрі Серік Жұманғарин. Үкімет отырысынан кейін журналистер сауалдарына жауап берген Жұманғарин әр тауардың бағасы әртүрлі көтерілетінін айтты.
«Айталық, дизель отыны 25 пайызға қымбаттаса жұмыртқа мен тауық еті 2 пайыз, қант 5 пайыз, күнбағыс майы 2,4 пайызға қымбаттайды, яғни 700 теңгедегі баға шамамен 15-17 теңгеге көтеріледі», – деді Серік Жұманғарин.
Премьер-министрдің орынбасары ірі ауылшаруашылығы өндірушілерінің көбі газ тұтынатынын да айтып, азық-түлік бағасына жанармайдың қымбаттауы қатты әсер етпейді деген пікір білдірді.
3 сәуірде энергетика министрінің міндетін атқарушы Болат Ақшолақов елде 12 сәуірден бастап бензин мен дизель отынының бағасы қымбаттайтынын мәлімдеген. Үкіметтің есебінше АИ-92 және АИ-93 маркалы бензиннің литрі қазіргі 182-187 теңгеден 205 теңгеге, дизель отынының бағасы 230-260 теңгеден 295 теңгеге көтеріледі. Ақшолақов жанармайдың қымбаттауына ел аумағынан транзитпен өтетін көліктердің жанармайға деген сұранысының артуы және жанармайдың көрші елдерге астыртын жолмен шығарылуы негізгі себеп болып отырғанын айтқан.
