«Адамның адамшылығы – жақсы ұстаздан» деп ұлы Абай айтқандай, өскелең ұрпақтың қалай бой түзейтіні мұғалімнің адал еңбегіне, педагогикалық шеберлігіне, өз мамандығына деген сүйіспеншілігіне байланысты. Осылай дегенде, Қарғалы ауылындағы Әсет Бейсеуов атындағы орта мектепте физика пәнінен сабақ беретін Бақытәлі Даулешиярдың өз ісінің нағыз білгірі екенін ерекшелеп айтқымыз келеді.
Бақытәлі физика зандылықтарын түсіндірген кезде тәжірибелік жұмыстарға ден қояды. Ол физиканы робототехникамен ұштастырып, мектепте «Өнертапқыштар әлемі» атты кішігірім топ құрып, кабинет жасақтады. Нәтижесінде оқушылар жасаған жаңа жобалар дүниеге келді. Физика сабағында тәжірибелік жұмыстар тек теорияның дұрыс екенін дәлелдеу үшін қажет болса, робототехника оны өмірде пайдалануға мүмкіндік беретіндігін көрсетті. Мысалы, 11-сынып оқушысы Тұрғанбай Ернұр тоқ кедергісімен электр моторының жылдамдығын басқара алатын, шамның жарықтығын өзгертіп, кванттық оптика бойынша жарық фотондарын қосу арқылы күннен автоматты түрде энергия алатын «робокүнбағыс» ойлап тапты. Оның бұл жобасы халықаралық ғылыми жарыста 2-орын алды. Сол сияқты ғылымға құштар оқушылар мектебімізде аз емес. «Автоматты қоқыс қабылдағыш», «Еден тазалайтын машина», «Автоматты мектеп қоңырауы», «Ақылды түнгі шам», «Жер сілкінісін хабарлағыш» сияқты жобаларды нәтижелі аяқтады. Олар бұл жетістіктерге тәлімгерінің арқасында қол жеткізді. Бақытәлі Дәулешияр оқушыларға білгенін үйретуден ешқашан жалықпайды.
Ел Тәуелсіздігінің 30 жылдығына орай «Тәуелсіздік ұрпақтары» атты республикалық байқауда «Биомеханикалық протез» жобасын ұсынған Бақытәлі Дәулешияр жеңімпаз атанып, Мемлекет басшысы Қасым-Жомарт Тоқаевтың қолынан марапат алды. Сондай-ақ «Қазақстан ұстазы» ұлттық байқауында педагогика саласындағы шығармашылық еңбегі үшін 50 жеңімпаздың қатарына қосылды.
Жаһандану заманында бәсекеге қабілетті болудың көрсеткіші білім деңгейімен өлшенетіндігі белгілі. Оқушылардың жетістігі, олардың халықаралық байқаулар мен олимпиадалардағы жеңістері – мұғалімдердің кәсібилігі мен құзыреттілігінің нағыз дәлелі.
Лаура ЖӘКЕНОВА,
Әсет Бейсеуов атындағыорта мектеп директорының
оқу-әдістемелік ісі жөніндегі орынбасары,
Қарғалы ауылы,
Жамбыл ауданы
