Жамбыл ауданындағы мектептердің бірқатарында екі дауыс беру учаскесінен орналасқан. Сондай білім орындарының бірі – Ұзынағаш ауылындағы жүз жылға жуық тарихы бар Тұрар Рысқұлов атындағы орта мектебі. Мұнда №263 және №264 дауыс беру учаскелері жұмыс істейді.
Мектептің спорт залында орналасқан №263 дауыс беру орнында 2593 сайлаушы, ал негізгі корпустағы №264-ші учаскеде 2554 сайлаушы бүгін өз таңдауларын жасамақ. Барлығын қосқанда бұл мектептің ғимаратында ертеңгі сағат 7.00 мен кешкі 20.00 аралығында 5147 азаматтың саяси таңдауы анықталуға тиіс. Жұмыс, әрине, өте ауқымды. Жауапкершілікті сезінген екі комиссияның мүшелерінде тыным жоқ. Азаматтардың заңға сәйкес дауыс беру тәртібінің сақталуы, жеке адамның құқығының бұзылмауы үшін әр сәтті қалт жібермеуге тырысып жатқанына куә болдық.
Осындағы дауыс беру үрдісін қалт жібермей қадағалап отырған бақылаушыларды көрдік. Олардың «Аманат» партиясы, «Дауыс» қоғамдық бірлестігі, аудандық «Әйелдерді қолдау» орталығынан екенін білдік. Аты-жөндерін Меруерт Нұрғали, Раушан Бапиева, Айжан Көшкін деп таныстырған бақылаушылар біз барған уақытқа дейін ешқандай заң бұзушылықты байқамағандарын, дауыс беру үрдісі белгіленген тәртіппен өтіп жатқанын айтты.
Аталған мектепте 2 мыңның үстінде оқушы білім алады. Мектеп басшысы Эльмира Мақашеваның өзі №264 сайлау учаскесінің төрағасы ретінде жауапты саяси науқанның жоғары деңгейде ұйымдастырылып, дұрыс өткізілуі үшін басы-қасында жүр. Таңғы сағат 7.00-де мемлекеттік гимн ойналып, ақсақал Ерлан Самсалиев бата беріп, алғашқы болып дауыс та беріпті. Ал жасы биыл 18-ге толған Даяна Асылбек өз қатарластарының алды болып таңдауын жасады. Бастауыш сынып мұғалімі Іңкәр Жамалова екі ұлымен және екі келінімен, немерелерімен келіп дауыс берді.
Серік САТЫБАЛДИЕВ
Жамбыл ауданы
