Қасымбек ауылында «Тексан Қазақстан Инвест» жауапкершілігі шектеулі серіктестігінің электр бұйымдарын шығаратын зауыты жұмыс істейді. Бұл кәсіпорынның құрылғанына 10 жылдан асты. Ауласы атшаптырым заманауи өндіріс орны бірнеше цехтан тұрады.
Мұнда жарықдиодты шамның 100-ден астам түрі шығарылады. Оның ішінде кеңсеге, көшеге, тұрмысқа және өнеркәсіп орындарына арналған әртүрлі шамдар бар. Бұдан бөлек электр сымдары, ыңғайлы оқушы парталары, көшеге, саябақтарға арналған әдемі орындықтар, кеңсе сейфтері, төсек сияқты басқа да сапалы бұйымдар өндіріледі. Өнімнің 350-ден астам түрі тұтынушыға жөнелтілуде. Бұйымға қажетті ою-өрнектер заманауи лазер қондырғысымен салынады.
Алғашында 25 жұмысшымен ісін бастаған кәсіпорында жұмысшылар саны жыл санап артып, 200-ге жеткен болатын. Өнім көлемі ұлғайып, жаңа цехтар іске қосылған. Өндіріс үдерісі қалыпты жолға қойылып, бірнеше жыл қатарынан тұрақты дамыды. Зауыттың техникалық жарақтандырылуына жыл сайын шамамен 500 млн теңге инвестиция салынды. Кәсіпорын өткен жылдары орта есеппен айына 200 мың бірлік өнім шығарып келді. Зауыт өнімдері өз елімізден басқа таяу шетелге, оның ішінде Қырғызстан мен Өзбекстанға, сондай-ақ Парсы шығанағы мен Латын Америкасына да экспортталды.
Алайда нарықтағы сұраныстың құбылмалылығынан және әлемді жайлаған індеттік жағдайларға байланысты өндіріс көлемі кейінгі жылдарда біраз кеміді. «Тексан Қазақстан Инвест» жауапкершілігі шектеулі серіктестігінің директоры Нұрмұхан Маделиевтің айтуынша, қазір зауытта 100-ден аса жұмысшы еңбек етеді. Әйткенмен, кәсіпорын өз қызметін нарықтағы жағдайға икемделіп жалғастырып келеді. Зауыт басшылығы болашақта өндіріс көлемін ұлғайтуға ниетті. Өйткені мұнда ең басты қағида – тек қана сапалы өнімдер шығару. Заман талабына сай отандық өнімді өрістету, жаңа технологиялар енгізуде өркениет көшінен қалыспау – бұл зауытқа тән үрдіс.
Серік САТЫБАЛДИЕВ,
Жамбыл ауданы
