«16 күндік белсенділік» атты екі аптаға жалғасатын науқанның басты мақсаты – тұрмыстық зорлық-зомбылықтың алдын алу. Іс-шара 25 қараша мен 10 желтоқсан аралығында өтеді.
Жыл басынан бері 3943 қылмыс тіркелген. Оның барлығы зорлық-зомбылыққа қатысты. Тек әйелдерді ғана емес кәмелеттік жасқа толмағандарға арам ойын жүзеге асырған жайттар да анықталған. Қоғамдағы түйткіл билік назарында. Бүгінде заң да күшейтілді.
Енді, зорлық-зомбылық құрбандарына барлығы араша түсе алады.
«Енді тұрмыстық зорлық-зомбылыққа қатысты іс қозғау үшін жәбірленушінің арыздануы міндетті емес. Бұл қадам зорлық-зомбылықты ертерек анықтап, құрбандарға уақытылы көмек көрсетуге мүмкіндік береді», – дейді Алматы облысының әйелдер істері және отбасылық-демографиялық саясат жөніндегі комиссиясының хатшысы Нұрхан Абдрахманов.
Ана мен баланы өзгенің азғын әрекеттерінен қорғау үшін құқық қорғау органдары белсене қызмет атқаруда. Қонаев қалалық полиция басқармасының әйелдерді зорлық-зомбылықтан қорғау тобының инспекторы Гүлмира Тәңібергенқызының айтуынша, полиция қызметкерлері дағдарыс орталықтарымен бірлесе жұмыс істейді. Олар әрбір зардап шеккен жанды тағдыр тәлкегіне тастамайды.
Облыста төрт дағдарыс орталығы жұмыс істейді, олар арқылы биыл 212 адам, оның ішінде 53 әйел және 159 бала көмек алды.
«Зорлық-зомбылықтан зардап шеккендерге тек физикалық көмек емес, психологиялық тұрғыдан да қолдау қажет. Біз олардың қоғамға қайта оралуы үшін барлық жағдайды жасап, қалпына келуіне көмектесеміз», – дейді психолог Жанар Нүсіпбайқызы.
