Алматы облысы басшысының қолдауымен Ұлы Жеңістің 78 жылдығына орай, Жамбыл ауданындағы «Көкбастау» атшабарында республикалық бәйге ұйымдастырылды.
Атшабарда өткен 21 шақырымдық аламан бәйгеге 33 сәйгүлік, 9 шақырымдық бәйгеге 11 құнан қатысты.
«Алматы облысының әкімі Марат Сұлтанғазиевтің қолдауымен осы жарысты ұйымдастырдық. Жалпы жүлде қоры 10 млн теңгеден асады. Бұл бәйге дәстүрлі түрде өтіп жатқанын айта кеткен жөн. Жарыс көрерменнің көңілінен шықты деген ойдамыз», – деді облыстық спорт басқармасының басшысы Нұрбақыт Теңізбаев.
Жарыс нәтижесінде Жамбыл ауданындағы Аққайнар ауылының «Қарақыз» атты сәйгүлігі құнан бәйгеде басқалардан оқ бойы озып келіп, шабандоз 1 млн теңгені қанжығасына байлады.
Ал 21 шақырымдық аламанда «Сұңқар» сәйгүлігі бірінші болып келіп, 5 млн теңгені ұтып алды.
Alatau News
