Қаңтардың сары аязы сақылдап тұрған шақта қиыр қонып, шет жайлаған малшы қауымның жайын білу маңызды. Олардың қыстан қысылмай шығуы үшін қандай қажеттіліктері бар екенін білу мақсатында Кеген ауданының әкімі Нұрбақыт Теңізбаев малшы қауымның тыныс-тіршілігімен танысып қайтты. Өңір басшысымен бірге аудан әкімінің орынбасары Мұхтар Батырханұлы, Тасашы ауылдық округінің әкімі Ерболат Төребаев округке қарасты шаруа қожалық қыстауларын аралады.
Шаруашылықтарды аралау барысында өңір басшысы ірілі-ұсақты мал бордақылау алаңдарында болып, қожалық иелеріне мемлекеттік бағдарламалар және субсидиялар туралы түсіндірді. Шаруалардың қарауындағы малдарын жүдетпей, қыстан шығынсыз шығару үшін табиғи жайылымдарды тиімді пайдаланып, қолдағы жем-шөбін үнемді қолдану керектігін айтты. Сонымен қатар, алдағы айрықша кезең – мал төлдету науқанына да дайындық жасау қажеттігін еске салды. Қора-жайдың қолайлылығы, жем-шөптің жеткіліктілігі жайын сұрап, малшы қауымды алаңдататын мәселелерге де назар аударды.
Аудан әкімі Ақтасты ауылына қарасты Айгүл Мәшінбаева төрағалық ететін «Дидар» шаруа қожалығына да ат басын бұрды. Бұл шаруа қожалықта 350 аналық архар-меринос қойы, 50 бас ірі қара, 40 бас жылқы бағылуда. Айгүл Оспанәліқызы мал азығы жеткілікті екенін айтып, алдағы уақытта мемлекет тарапынан шаруаларға көрсетіліп жатқан қолдауларды тиімді пайдаланатынын жеткізді.
Аудан әкімі Нұрбақыт Теңізбаев өз сөзінде:
– Шаруалардың азық-түлігі, малының жем-шөбі, отын-суы жеткілікті болуы қажет. Сонымен қатар ауылдық округ әкімдері мен мал дәрігерлері шаруалармен жиі байланыста болулары тиіс, – деді.
Аудан әкімі бастаған топ Кеген, Жалағаш ауылдық округтеріне қарасты шаруа қожалықтарын да аралады.
Дәурен ӘБУТӘЛІПОВ,
Кеген ауданы
