Балалардың қауіпсіздігін қамтамасыз ету және оларға қатысты жол-көлік оқиғаларын болдырмау мақсатында Қарасай ауданының мектеп оқушылары технология сабағында өте маңызды және қажетті іс атқаруда. Атап айтқанда, сыртқы киімдеріне жарық қайтаратын ленталар тігуді қолға алған.
Шынымен, жаңалықтардан және әлеуметтік желілерден жиі еститін «Автокөлік оқиғасынан қаза тапты» деген жаманатты хабарлардың жүрегімізге жүк түсіріп жүргені анық. Солардың қатарында қаншама бала жарақат алып, мүгедек болды, қыршынынан қиылды. Оны ойлаудың өзі қорқынышты.
Қазақстан Республикасы Бас прокуратурасының Құқықтық статистика және арнайы есепке алу комитетінің деректеріне сәйкес, өткен жылы 31 мыңнан астам жол-көлік оқиғасы тіркеліп, 40 мыңнан астам адам зардап шеккен, 2,5 мың адам қаза тапқан. Жарақат алғандар саны 109 пайызға артқан. Қаза тапқандар мен зардап шеккендердің арасында балалар да бар. Қайғылы оқиға көбінесе Алматы, Астана және Шымкент қалаларында орын алатыны да белгілі.
Осыған байланысты балалардың жол-көлік оқиғасына ұшырауының алдын алу және қауіпсіздігін қамтамасыз ету басты міндеттердің бірі болып қала бермек. Бұл бағытта үлкен жұмыс атқарылып келеді. Бейнекамераларды орнатуға, айналма жолдарды, жаяу жүргіншілер көпірлерін, эстакадаларды салуға үлкен қаражат бөлінуде. Полиция қызметкерлері ақпараттық-түсіндіру жұмысын күшейте түскен. Осыған орай Қарасай ауданындағы білім беру ұйымдары жол қозғалысының қауіпсіздігін қамтамасыз етуге өз үлестерін қосуда. Атап айтқанда, аудандық білім бөлімі мен аудандық полиция басқармасының бастамасымен 1-7-сынып оқушыларының киімдеріне және мектеп сөмкелеріне жарық қайтаратын лента тігу жұмысы қолға алынған. Оған 5-7-сыныптар жауапты болса, 8-9-сынып оқушылары қолдау көрсетіп келеді. Бұл жұмыс мектеп шеберханаларында орнатылған арнайы өнеркәсіптік тігін машиналарының көмегімен атқарылуда. Осылайша балалар өздері мен сыныптастарының мектепке бару және үйге қайтудағы қауіпсіздігін қамтамасыз етуде.
Аталған шараның орындалуын көру үшін Кошмамбет ауылындағы «Жайлы мектеп» ұлттық жобасы бойынша салынған жаңа білім ошағына барған едік.
– Мен осы маңызды іске қатысып, өз үлесімді қосқаныма қуаныштымын, – дейді 9-сынып оқушысы Аяулым Қыпшақпай. – Біз көбінесе таңертең ерте мектепке барамыз да, кешкі қараңғыда қайтамыз. Мұндай жағдайда жарық қайтаратын ленталар оқушылардың көлік жүргізушілерінің назарына ілігіп, қауіпсіздігін сақтауға көмектеседі. Бұл ленталарды біз балалардың сыртқы киімдеріне тігіп жатырмыз.
Бұл жобаның өмірге сәтті енгізілуіне қатысты Қарасай аудандық білім бөлімінің басшысы Әсел Еркімбаева да өз пікірін білдірді.
– Біздің ауданымызда автокөліктердің саны жыл сайын артып келеді, – деді Әсел Әблеқызы. – Бұл өз кезегінде жол апатының артуына әкеліп соғуда. Әсіресе кішкентай балалардың қауіпсіздігіне ерекше көңіл бөлу керек, себебі олар жолда жүру кезінде дұрыс бағдар жасай алмайды. Осыған байланысты әр мектепте жол қозғалысы ережесі туралы түсіндіру жұмысы жүргізіледі, қауіпсіздік шарасы туралы айтылады. Біздің бастамамыздың мәні аталған жұмыстың балалардың қатысуымен жүзеге асырылуында деп ойлаймын. Киімдерде алыстан көрінетін және жүргізушінің көзіне бірден түсетін жарық қайтарғыш элементтер балаларды жол-көлік оқиғаларына ұшырауының алдын алу шараларының бірі болмақ. Біз бұл бастаманың қайғылы оқиғаларды болдырмауға және оқушылардың қауіпсіздігін қамтамасыз етуге көмектесетініне сенеміз.
Қуат Қайранбаев
Қарасай ауданы
