Алматы облысы әкімінің жұртшылықпен кездесуінде тұрғындар бірқатар мәселелерді көтерді. Оның бірі – Бурабай шағын ауданында ауыз судың тапшылығы.
Тұрғынның айтуынша, Мемлекет басшысы Алматы облысының ауыз су мәселесін шешу туралы тапсырманы бергелі бірнеше жыл өткен. Алайда, бұл мәселе әлі толық шешілмеген.
«Біз Бесағаш ауылындағы «Бурабай» шағын ауданында тұрамыз. Бірақ жергілікті әкімдік су тарту мәселесін шешпеген соң, 2018 жылы «Тасқынсу» ЖШС-мен келісімшартқа қол қойып, өз-өзімізді сумен қамтамасыз ете бастадық. Қазіргі таңда бұл серіктестік қарызға батып қалған. Сол себепті су белгілі бір уақыт кестесімен беріліп жатыр. Мәселеміз қашан шешіледі?», – деді тұрғын.
Облыс әкімі бұл түйіткілдің бар екенін жасырмады. Оның айтуынша, мұнда шағын аудан тұрғызбас бұрын судың қысымы есептелмеген.
«Бұл ауданда су желілерінің 57 пайызы тозған. Әрине, судың қысымы да жеткіліксіз. Сол себепті біз Бесағашта 9 және 12 қабатты үй тұрғызуға тыйым салдық. Сіз тұрып жатқан шағын ауданның құрылысы басталарда тиісті есптеулер жасалмаған. Талғар ауданының 75 шақырым су желісіне жөндеу жүргізілетінін айта кеткен жөн. Нәтижесінде 15 000 тұрғын сумен қамтылады», – деді аймақ басшысы Марат Сұлтанғазиев.
Ал аудан әкімі Танат Айдарбеков Бурабай шағын ауданының мәселесін шешу мақсатында жоба-сметалық құжаты дайындалып жатқанын айтты. Жобаның жалпы құны 6,6 млрд теңге.
Alatau News
