Кеген аудандық Мәдениет үйінде Алғыс айту күніне орай «Бейбітшілік бастауы – бірлік пен келісім» атты салтанатты шара өтті. Жиналған көпшілікті мерекемен құттықтаған аудан әкімі Нұрбақыт Теңізбаев өңірдің, жалпы еліміздің дамуына үлес қосып жүрген жерлестерінің еңбегі өлшеусіз екенін атап өтті.
– Алғыс айту күні, ең алдымен, елімізде тыныштық пен үндестік, өзара сенімділік пен құрметтің орнығуына негіз болған бейбітшілік пен келісім саясатының салтанатты күні десек, артық айтпаймыз, – дей келе, этнос өкілдерін Алғыс хатпен марапаттады.
Келесі сөз кезегін алған облыстық ішкі саясат басқармасы қоғамдық келісім және даму орталығы басшысының орынбасары Айымжан Тәңірбергенова: «Қазақстан халқының ынтымағы мен бірлігі – қоғамның басты байлығы. Сондықтан біз татулықты одан әрі нығайтуға күш салуымыз қажет»,– деді.
Алғыс айту күніне орай бірқатар азаматқа қоғамдық келісім және даму орталығының Алғыс хаттары мен бағалы сыйлықтар тапсырылды. Шара барысында Кеген аудандық ақсақалдар кеңесінің төрағасы Нұрлыбай Көпжасар, аудан жастары атынан Салтанат Саматқызы сөз алып, ыстық ықыластарын жеткізді.
Салтанатты жиын соңында өңір өнерпаздары ән мен жырдан шашу шашып, мерекенің шырайын аша түсті.
Дәурен ӘБУТӘЛІПОВ
Кеген ауданы
