Қазақ халқында «Өткенін білмеген елдің болашағы да бұлыңғыр» деген тәмсіл бар. Мемлекеттігімізді қалыптастырып, тәуелсіздігімізді баянды ету үшін тіліміздің атқарар рөлі қаншалықты маңызды болса, ата-бабаларымыздан жеткен даңқты тарихымызды шаң-тозаңнан аршып, ұрпақ санасына сіңірудің де алар орны ерекше.
Осы орайда, Қарасай ауданына қарасты Кемертоған ауылындағы орта мектепте «Төрт дәуір – бір тарих: ұлт болмысының қалыптасуы» тақырыбында облыстық тәжірибелік алаң ұйымдастырылды. Аталған шараға білім мекемелерінде тарих пәнінен сабақ беретін 92 мұғалім қатысты.
Алаң жұмысының салтанатты ашылу рәсімінде облыстық әдістемелік орталықтың әдіскері Қ. Тоғызбаев, Қарасай аудандық білім бөлімі әдістемелік кабинетінің меңгерушісі Ж.Бегалиев қатысушыларға сәттілік тіледі.
Тәжірибелік алаңның жұмысы Қазақстан тарихын қамтитын төрт кезең оқиғалары негізінде жүргізілді. «Ерте заман тарихы» алаңында А.Байжанов атындағы орта мектептің тарих пәні мұғалімі, педагог-зерттеуші Е.Тұралықызы мен Қазақ-Британ халықаралық (Ғылым&Инновация) мектебінің тарих пәні мұғалімі, педагог-зерттеуші Ж.Баймолдинаның жұмысы таныстырылды.
«Орта ғасырлар тарихы» бойынша Кемертоған орта мектебінің тарих пәні мұғалімдері, педагог-зерттеушілер Х.Ислам, Б.Өтеғұловалар ойларын ортаға салды.
«Жаңа заман тарихы» алаңында Кемертоған орта мектебінің тарих пәні мұғалімдері, педагог-сарапшы А.Балтабаева мен педагог-модератор А.Әлімованың еңбектеріне баға берілді. «Қазіргі заман тарихы» алаңында Абай атындағы ОМГ тарих пәні мұғалімдері, педагог-зерттеушілер Э.Есмұратова мен А.Қалиеваның тәжірибесіне қанықты. Бұдан кейін Кемертоған орта мектебінің психологы, педагог-зерттеуші Ж.Рамазанова «Эмоционалдық тепе-теңдік сәті» тақырыбында тренинг өткізді.
Тарих пәні ұстаздарының басқосу жиынын мектеп директоры А.Әбішева жүргізді. Келген қонақтармен қазақтың тарихи тұлғаларына қатысты әңгіме тиегі ағытылды. Тәжірибелік алаң жұмысын Қ.Тоғызбаев қорытындылап, белсенділік танытқан ұстаздарға сертификаттар табыстады.
Қуат Қайранбаев
Қарасай ауданы