Алатау қаласы Заречный шағынауданындағы амбулатория 6000-ға жуық тұрғынға заманауи медициналық қызмет көрсетуде. Амбулатория барлық қажетті медициналық құрал-жабдықпен қамтамасыз етілген.
Мұнда тоғыз білікті медицина қызметкері күніне елуге жуық адамға ем-дом жасайды. Нысанда балалар мен жүкті әйелдер, күндізгі ем қабылдайтын бөлім және зертхана жұмыс істейді. Бұл жерде жедел көмек көрсетуге, науқастарды қабылдауға, ем жүргізуге толық жағдай жасалған. Жұмысқа жас мамандарды қабылдауға да мүмкіндіктер қарастырылған. Дәрігерлер мен орта және кіші буын қызметкерлеріне, терапевт, тағы басқа сала мамандарына жұмыс істеуге өте қолайлы орта қалыптасқан. Егу, ем-шара бөлмесі де науқастарды қарауға, алғашқы медициналық жәрдем көрсетуге ыңғайлы. Заманауи дәрігерлік амбулаторияда екі жалпы тәжірибелі дәрігер, бір фельдшер, бес медбике, бір зертханашы және бір акушер халыққа қызмет көрсетуде. Амбулаторияның жағдайы жақсы, жүйелі жұмыс істеп тұр. Алатау қаласының тұрғындары бірегей медицина мекемесіне күнделікті алғыс айтып келеді.
Гүлмира РАХМЕТОВА,
Заречный амбулаториясының аға медбикесі
Алатау қаласы
