Еліміздің мемлекеттік орман қорының алқабы 31 млн га құрайды, оның ішінде орманмен көмкерілген жерлер – 13,9 млн га. ҚР Экология және табиғи ресурстар министрлігі мүдделі мемлекеттік органдармен бірлесіп, ірі орман өрттерінің алдын алу шараларын қабылдады. Бұл туралы ОКҚ алаңында өткен баспасөз конференциясында ведомствоның вице-министрі Нұркен Шәрбиев мәлімдеді.
Спикердің айтуынша, орман шаруашылықтарын жабдықтау нормалары мен нормативтері қайта қаралып бекітілді. Оларда өртке қарсы техника мен жабдықтардың тізімін кеңейтіліп, саны көбейтілді. Үкімет қаулысына орман шаруашылықтарын утиль төлем есебінен жабдықтау мүмкіндігіне қатысты өзгерістер енгізілді.
Сондай-ақ Нұркен Шәрбиев елдің оңтүстік және батыс өңірлері үшін өрт маусымы 26 наурыздан , солтүстік және орталық өңірлер үшін 7 сәуірден, ал шығыс өңірде 14 сәуірден бастап белгіленгенін атап өтті. Биыл республикалық бюджеттен орман шаруашылығын жарақтандыруға 3,1 млрд теңге бөлінді. Бұдан бөлек, лизингтік қаржыландыру шеңберінде Өнеркәсіпті дамыту қоры арқылы 35 млрд теңге, оның ішінде Орман шаруашылығы және жануарлар дүниесі комитетіне қарасты ведомстволық ұйымдар үшін 15 млрд теңге көзделген.
«Жыл басынан бері Экология және табиғи ресурстар министрлігінің мекемелері үшін 3,7 млрд теңгеге 136 шағын орман өрт сөндіру кешені мен 60 трактор жеткізілді. Маусым айының соңына дейін қалған 166 өрт сөндіру машинасы, 27 шағын орман өрт сөндіру кешені және 15 трактор жеткізіледі деп күтілуде. Биыл облыс әкімдіктері орман шаруашылығын жарақтандыруға жергілікті бюджеттен 6,3 млрд теңге және лизинг есебінен 20 млрд теңге бөлді. Осылайша, жыл соңына дейін әкімдіктер орман шаруашылықтарына 186 өрт сөндіру машинасын, 186 шағын орман өрт сөндіру кешенін және 247 тракторды сатып алады деп жоспарланған. Қабылданып жатқан шаралар еліміздің өрт қаупі ең жоғары 11 өңірінде орман шаруашылығын жаңартуға және жарақтандыруға мүмкіндік береді», – деді вице-министр.
