Облыс әкімінің орынбасары Әсет Масабаев «SM Строй 2017» компаниясы және оның стратегиялық серіктестері өкілдерімен кездесті. Басқосуда тараптар ауыл шаруашылығын дамыту, құрылыс және инфрақұрылым салалары бойынша өзара ынтымақтастық жайын талқылады.
Қытайдың жетекші компанияларының Қазақстандағы өкілдері «SM Строй 2017» ЖШС директоры Бақтархан Мырзабек, China Railway Construction Engineering Group (CRCEG), China International WATER & ELECTRIC Corp, China Railway No9 Group Co., Ltd және Zhongguancun SmartCity Co., Ltd қатысқан жиынның күн тәртібінде үш негізгі мәселе көтерілді. Оның бірі – облыс аумағында су ресурстарын үнемдеу мақсатында ауыл шаруашылығы үшін су арналарын құру бойынша «SM Строй 2017» компаниясының презентациясы көрсетілді.
Кездесуде облыс әкімінің орынбасары Әсет Дүйсебекұлы шетелдік инвесторларға алғысын білдіріп, Қытай компанияларының өңір дамуына қосар үлесінің зор екенін атап өтті.
– Қытай елінің өркендеу жолында жинаған мол тәжірибесі біз үшін аса маңызды. Сол себепті сіздерді жаңа даму сатысындағы облысымыздың құрылыс, өнеркәсіп, инфрақұрылым салаларына кеңінен қатысуға шақырамыз. Біздің облысымыз – еліміздегі әлеуеті жоғары, қарқынды даму сатысындағы аймақтардың бірі. Тиімді жобалар арқылы өзара ынтымақтастықты дамытуға дайынбыз, – деді.
Өз кезегінде сөз алған «SM Строй 2017» ЖШС директоры Бақтархан Мырзабек компанияның өңірге инвестиция тартуға мүдделі екенін айтып, бірқатар жобаны таныстырды. Ауыл шаруашылығын заманауи технологиялармен жабдықтап, сумен қамтамасыз ететін жобаның өңір әлеуетін арттыруға септігін тигізетінін алға тартты. Серіктес Қытай компаниялары да өз ұсыныстарын жеткізді.
Басқосуда, сондай-ақ, ауыл шаруашылығын дамыту, зауыттар салу, тау-кен металлургия, жаңартылатын энергия көздерін өндіру мәселелері де кеңінен сөз болды.
Құралбек СӘБИТОВ
