Алматы облысының Өңірлік коммуникациялар қызметінде өткен баспасөз мәслихатында облыстық ПД Есірткі қылмысына қарсы іс-қимыл басқармасының бастығы, полиция подполковнигі Ардақ Қайсаров 2025 жылдың I тоқсанындағы жұмыс қорытындыларын жария етті.
Есірткіге тәуелділерден бұрын, көл-көсір пайда табуды көздейтіндердің қатары көп. Өкініштісі, бұғанасы бекімеген бозбалалар да есірткі саудасымен айналысып, пайда табуға әуес болып жүр.
Ресми деректерге сүйенсек, 16-18 жас аралығындағы жасөспірімдер сайттар мен әлеуметтік желілердегі көз тартар жарнамаларға сеніп, жұмыс істеуге келісім береді. Алайда олардың артында көлеңкелі әрекеттер — яғни, есірткіні жасырын тасымалдау мен сату – жатқанын аңғармайды. Нәтижесінде, тапқан табыстары темір торға апарар төте жолға айналып жатыр.
Алматы облысы ПД Есірткі қылмысына қарсы іс-қимыл басқармасының бастығы Ардақ Қайсаровтың айтуынша, өңірде есірткі қылмысы белең алып тұр.
– Жыл басынан бері Алматы облысында есірткі қылмыстарына қарсы бағытталған іс-шаралардың нәтижесінде 63 құқықбұзушылық фактісі тіркелді. Оның ішінде 30 қылмыстық іс және 33 есірткіге байланысты әкімшілік құқықбұзушылық анықталды. Аталған шаралар аясында заңсыз айналымнан 937 келі 622 грамм есірткі заты тәркіленді. Сонымен қатар, есірткі өндіруге арналған 4 жасырын зертхана анықталып, олардың қызметі тоқтатылды, – деді спикер.
Жоғарыда атап өткендей, есірткі саудасы бүгінде интернет-дүкендер мен сайттарда кең таралған. Осыған байланысты жергілікті полиция департаменті «Кибернадзор» жүйесін іске қосты. Нәтижесінде, 520 интернет-ресурс бұғатталды.
Айта кетейік, 2025 жылдың I тоқсанында есірткі қылмыстарының алдын алу мақсатында 171 профилактикалық іс-шара және мектеп оқушыларына арналған 100 дәріс ұйымдастырылды.
