Облыстық мәслихаттың кезекті ХХХVІ сессиясы өтті. Сессия отырысына облыс әкімінің бірінші Нұрлан Әбдірахым, облыстық ардагерлер ұйымының төрағасы, құқық қорғау органдарының басшылары, департамент пен басқарма басшылары және онлайн режимде қала, аудан әкімдері мен мәслихат төрағалары қатысты. Басқосуды облыстық мәслихат төрағасы Қуат Байғожаев жүргізіп отырды.
Күн тәртібіндегі бірінші мәселе бойынша сөз кезегі облыстық цифрлық технологиялар басқармасының басшысы Жандос Ақылға берілді.
– 2023 жылдың 27 қазанында бекітілген «Қолжетімді интернет» ұлттық жобасына сәйкес «Талшықты-оптикалық байланыс желілері арқылы елдімекендерде интернетке кең жолақты қолжетімділікті қамтамасыз ету» іс-шарасы шеңберінде 2027 жылға дейін 70 ауыл интернетпен қамтылады. «Соңғы мильді» субсидиялау» іс-шарасы аясында мемлекеттік мекемелеріне дейін талшықты-оптикалық байланыс желілері жеткізілген 86 ауылдың тұрғындары жоғары жылдамдықты интернеттің игілігін көреді. «Кең жолақты қолжетімділік қызметтерін ұсыну үшін ғарыштық байланыс жүйесінің ресурстарын пайдалана отырып, аз қоныстанған ауылдарда спутниктік арналарды ұйымдастыру» іс-шарасы бойынша 7 ауыл интернетпен қамтылады. 2023 жылдан бастап Қонаев қаласында байланыс операторларының 5G стандартындағы 29 базалық стансасы орнатылды. Жылдың соңына дейін қалада тағы 15 базалық станса орнатылады, – деген басқарма басшысы облыстың көлік жолдарын мобильді байланыспен және интернетпен қамтамасыз ету көзделгенін жеткізді. Баяндамашының айтуынша, облыс халқын тұрақты жоғары жылдамдықты интернетпен қамтамасыз ету мақсатында «Алатау Жарық Компаниясы» АҚ-мен шағын байланыс операторларына электр беру желілерінің тіректерін өтеусіз негізде беру жөнінде келісімге қол жеткізілген. Цифрлық технологиялар басқармасы басшысының «Қолжетімді Интернет» ұлттық жобасын іске асыру барысы туралы баяндамасын тыңдаған соң, депутаттар оны қолдап, дауыс берді.
Сессия барысында халық қалаулылары Іле ауданы Өтеген батыр ауылындағы Мәдениет үйіне Нұрғиса Тілендиевтің есімін беру жөніндегі ұсынысты республикалық ономастикалық комиссияның қарауына жолдануын бірауыздан мақұлдады. Сонымен қатар облыстық бюджет комиссиясының, облыс әкімдігі жанындағы терроризмге қарсы комиссияның, облыстық аумақтық сайлау комиссиясының және облыстық мәслихат депутаттарын сайлау жөніндегі округтік сайлау комиссияларының құрамына өзгерістер енгізілді.
Сессия отырысын облыс әкімінің бірінші орынбасары Нұрлан Әбдірахым қорытындылады.
Айжарық КӨПТІЛЕУОВ
