Қонаев қаласындағы орталық жағажайдың уоркаут алаңында «Дала қырандары» қоғамдық бірлестігінің ұйымдастыруымен «Жаттығу» республикалық акциясы өтті.
Елімізге белгілі спортшылар онлайн байланыс арқылы жиналған көпшілікпен бірге таңғы жаттығу жасады. Сол арқылы жастардың дене шынықтыруға деген сүйіспеншілігін арттыруға және салауатты өмір салтын қалыптастыруға серпін берді.
«Акцияға қатысушылардың жасына шектеу қойылмады. Таңғы жаттығудың адам денсаулығына пайдасы мол. Күні бойы көңіл-күйің көтеріліп, күш-қуатың артып, сергек жүресің. «Жаттығу» акциясының өтуіне ҚР Туризм және спорт министрлігі мен «Дала қырандары» қоғамдық бірлестігі қолдау көрсетті. «Дала қырандары» – елімізді көркейту жолындағы мақсаты айқын, мүддесі бір белсенді жастардың басын қосқан бірлестік», – деді грек-рим күресінен Азия чемпионы, «Дала қырандары» жастар бірлестігінің өкілі Асхат Дильмұхамедов.
Таңғы жаттығу аяқталғаннан кейін жағажайдағы уоркаут алаңында сенбілік өтті.
«Түрлі жас санатындағы тұрғындар арасында дене шынықтыру мен спортты насихаттау мақсатында ұйымдастырылған шара жастарды қарапайым, бірақ маңызды жұмыстарға – ауланы тазалау, спорт алаңдарын қалпына келтіруге бағытталған. Осылайша, Алматы облысының спортшылары Мемлекет басшысы Қасым-Жомарт Тоқаевтың бастамасымен жүзеге асқан «Таза Қазақстан» республикалық акциясын қолдап, еліміздің экологиялық жағдайын жақсартуға өз үлестерін қосуда»,- деді дзюдодан халықаралық спорт шебері, «Дала қырандары» қоғамдық бірлестігінің өкілі Болатбек Жұмагереев.
«Дала қырандары» жастар қоғамдық бірлестігінің ұйымдастыруымен өткен республикалық акцияға еліміз бойынша 2000-нан астам адам қатысты.
