Екінші дүниежүзілік соғыста Отан үшін жан аямай, майдан даласында қасық қаны қалғанша шайқасып, осы жолда шейіт болған қаншама есіл ерлер жат жердің топырағын жастанды. Қанды қырғында ерлікпен көз жұмған боздақтардың бірі – Балқаштың перзенті, Ресей батыры, Қазақстанның Халық қаһарманы Бақтыораз Бейсекбаев.
Батыр ерлігін жастардың санасына сіңіру мақсатында Балқаш аудандық Мәдениет үйінде «Халық қаһарманы – Бақтыораз» атты отаншылдық рухты дәріптейтін облыстық конференция өтті. Шараға арнайы шақырылған қонақтар Мәдениет үйіне кірген сәтте аудандық балалар өнер мектебінің ұлт аспаптар ансамблі күмбірлете күй шертсе, аудандық кітапхана қызметкерлері кітап көрмесін ұйымдастырды.
Кеште Балқаш ауданының әкімі Азат Құтпанбетов Жеңіс қарсаңында атқарылған іс-шараларға кеңінен тоқталып, Бақтыораз Шәмпекұлының ерлік жолы – бүгінгі ұрпаққа өнеге екенін атап өтті.
Бұдан кейін аудандық кітапхана өткізген эссе байқауының үздік мақалалары топтастырылған «Балқаштың батыр ұланы» атты кітаптың тұсауы кесіліп, жүлдегерлерге Алғыс хаттар мен ақшалай сыйлықтар табысталды.
Қазақстан Журналистер одағы сыйлығының лауреаты, Қазақстан Жазушылар Одағының мүшесі, Алматы облысының Құрметті азаматы, жерлесіміз Әли Әпекұлы мен облыстық кітапхананың директоры Ғалия Тоқабаева батырдың қан майданда көрсеткен ерлігіне тоқталып, ұйымдастырылған іс-шараға жоғары баға беріп, ризашылығын білдірді. Бақтыораз Бейсекбаевтың ұрпақтары атынан сөз алған Жанымкүл Шәмпекова өзінің жүрекжарды лебізін білдірді.
Жерлесімізді еске алуға арналған іс-шара барысында аудандық Мәдениет үйі жанынан құрылған «Бақанас» театрының әртістері ағасы Бейсекбайдың Бақтыораз бауырын соғысқа шығарып салған сәтін сахналап, аудан өнерпаздары патриоттық әндер шырқап еске алу шарасының мазмұнын арттыра түсті.
Бақтығали ДӘУІТБАЕВ,
Балқаш ауданы
