2025 жылдың 5 сәуірінен бастап мопедтер Қазақстан Республикасының заңнамасына сәйкес ресми түрде механикалық көлік құралдарына теңестірілді. Енді мопед жүргізу үшін полицияда тіркеуден өту, A1, A немесе B санатындағы жүргізуші куәлігіне ие болу, техникалық байқаудан өту және азаматтық-құқықтық жауапкершілікті міндетті сақтандыру талап етіледі.
Заңнамадағы өзгерістерге байланысты халықты ақпараттандыру бойынша бірқатар ұйымдастыру жұмыстары жүргізілген.
– 2025 жылдың 17 қаңтардан бастап, мопедтерді механикалық көлік құралдарына теңестіретін заңнамалық түзетулер күшіне енгенге дейін, пилоттық жоба аясында мопедтерді тіркеу жұмыстары жүргізіліп, бұл туралы бұқаралық ақпарат құралдары арқылы халыққа кеңінен жеткізілді. Сонымен қатар, жүргізуші куәлігін алу үшін практикалық емтихан тапсыруға қажетті көлік құралдары да қамтамасыз етілген, – деді Алматы облысы ПД Әкімшілік полиция басқармасы бастығының міндетін атқарушы Алмас Кегенбаев.
Облыста мопед сататын барлық дүкендер тексеруден өтті. Барлық сатылымдағы мопедтерде заңды құжаттары мен арнайы VIN-нөмірлері бар. Сонымен қатар, Талғар, Қарасай, Еңбекшіқазақ және Жамбыл аудандарында криминалист-сарапшылардың қатысуымен көшпелі тексерулер жүргізілді.
– Бүгінгі күні Алматы облысы бойынша 1761 мопед тіркеуге қойылды. Тіркеу жұмыстары жүйелі жүргізіліп, ақпараттық жүйелер қалыпты режимде жұмыс істеп тұр. Әлеуметтік желілерге тұрақты мониторинг жүргізілуде, – деді спикер.
