Қазіргі таңда экологиялық жағдай – тек бір елдің ғана емес, күллі әлем жұртшылығының басты назарындағы мәселе. Адамзат өркениетінің дамуы табиғатқа айтарлықтай салмақ салып отырғаны белгілі. Ауа мен судың ластануы, жасыл желектердің азаюы мен тұрмыстық қалдықтардың көбеюі – осының айқын дәлелі. Бұл түйткілдер Қазақстанда да өзекті болып отыр, әсіресе, жаңадан құрылып, қарқынды дамып келе жатқан Алатау секілді жас қала үшін де назар аударар басты мәселенің бірі.
Алатау қаласында ел Президентінің «Таза Қазақстан» акциясын ары қарай қолдау және дамыту мақсатында «Таза табиғат – ұлт болашағы» атты экологиялық бастама көтерілді. Бұл – қоршаған ортаны сақтауға бағытталған ұлттық ауқымдағы маңызды жоба. Ол халықтың экологиялық мәдениетін арттыруды, табиғатты аялап қорғауға бағытталған азаматтық белсенділікті нығайтуды көздейді. Алатау қаласында бұл бағытта бірқатар жүйелі жұмыс жолға қойылды. Апта сайын ұйымдастырылатын сенбілік барысында қаланың әрбір ықшамауданында тазалық жұмыстары жүргізілуде. Қоқыс қалдықтары арнайы техникамен шығарылып, тазартылуда.Сонымен қатар, тұрғындар арасында қоқысты сұрыптап тастау мәдениетін енгізу жұмыстары да қолға алынған.
Алатау қаласының мектептері мен балабақшаларында экологиялық тәрбиеге ерекше көңіл бөлінуде. Балаларға табиғатты сүю, оған жанашыр болу, қоршаған ортаға ұқыпты қарау туралы түрлі үйірмелер мен жобалар, сурет көрмелері және танымдық сабақтар ұйымдастырылып отыр. Бұл – болашақ ұрпақтың бойына табиғатқа деген жауапкершілікті сіңірудің маңызды қадамы.
Мемлекет басшысы Қасым-Жомарт Тоқаев өз сөзінде: «Біз табиғатты сақтауға ұмтылғанда ғана ұрпағымызға жарқын болашақ қалдыра аламыз», – деп атап өткен болатын. Сондықтан бұл бағыттағы жұмыстар тек мемлекеттік органдардың ғана емес, бүкіл қоғамның ортақ ісіне айналуы тиіс.
Алатау қаласы әкімдігі барлық тұрғындарды тазалыққа үлес қосуға, қоршаған ортаны қорғауға бағытталған іс-шараларға белсенді араласуға шақырады. Әрбір адамның қарапайым күнделікті әрекеті – өз ауласын таза ұстау, қоқысты кез келген жерге тастамау, ағаш отырғызу – бұл қаламыздың экологиялық келбетіне қосылған үлес екенін ұмытпайық.
Таза табиғат – салауатты өмірдің кепілі. Алатау қаласы жарқын болашағын тек технологиялық дамуымен емес, таза, қауіпсіз, жайлы ортасымен де қалыптастырады. Сондықтан, әрқайсымыз табиғатпен үйлесімді өмір сүруге ұмтылайық! Келешек ұрпаққа көрікті қала мен таза ауаны мирас етіп қалдыру – баршамыздың ортақ міндетіміз!
Риза САУЫРБАЕВА,
Алатау қалалық аналар кеңесінің төрағасы
