Қарасай ауданына қарасты Шамалған ауылындағы «Үшқоңыр» спорт кешенінде Алматы облысының мемлекеттік қызметшілері арасында XV жазғы спартакиада өтті. Жарысқа қала мен аудан әкімдіктерінен және құқық қорғау саласы қызметкерлерінен құралған 17 команда қатысты.
Екі күнге созылған спартакиадада волейболдан, жүзуден, шағын футболдан, үстел теннисінен, бильярдтан, тоғызқұмалақ пен қазақ күресінен қызу бәсеке өтті.
Жарыс қорытындысы бойынша, Еңбекшіқазақ ауданы әкімдігінің қызметкерлері жеңімпаз атанды. Екінші орынды Кеген ауданы әкімдігі иеленді. Үшінші жүлде Райымбек ауданының үлесіне бұйырды.
Ал, құқық қорғау органдары қызметкерлерінің арасындағы тартысты ойында Алматы облысы бойынша төтенше жағдай жөніндегі департаменті қызметкерлері бірінші орынға қол жеткізді. Алматы және Жетісу облыстары бойынша қылмыстық атқару жүйесінің қызметкерлері екінші, облыстық прокуратура қызметкерлері үшінші орындардан көрінді.
Аталған жарыста мемлекеттік қызметшілер тек кәсіби міндетін ғана атқарып қоймай, спортты да серік етіп жүргендері анық байқалды.
Қуат Қайранбаев,
Қарасай ауданы
