Алматы облысы АИТВ-инфекциясына қарсы күресте үлкен қадамдар жасап келеді. Соңғы екі жылда өңірде АИТВ-ның анадан балаға берілуінің бірде-бір жағдайы тіркелмеді.
Бұл туралы Қонаев қаласында өткен брифингте облыстық ЖИТС орталығының директоры Алмас Масалимов 2025 жылдың 8 айындағы жұмыстың қорытындыларын таныстыруында мәлімдеді.
Директор ЖИТС орталығының негізгі жетістіктерін атап өтті. Оның сөзінше, балалар сау болып дүниеге келуде. Осы жылдың сегіз айында өңірде АИТВ-мен өмір сүретін 24 әйел босанды. Олардың барлығы толық антиретровирустық профилактика курсынан өтті. Жаңа туған сәбилер де дәл осындай курстан өтті. Нәтижесінде — балалардың 100 %-ы вирустан қорғалды.
«Заманауи терапияның тиімділігі айқын: АИТВ-мен өмір сүретін және ем қабылдайтын адамдар денсаулықтарын сақтап қана қоймай, вирусты жақындарына да жұқтырмайды», — деп атап өтті Алмас Байқұрмашұлы.
Бүгінде Алматы облысында АИТВ -мен өмір сүретін шамамен 2 800 адам есепте тұр. Олардың 2 700-і тұрақты түрде терапия қабылдайды — бұл науқастардың 90 %-ын құрайды және көрсеткіш өсуде.
АИТВ-тен өлім-жітім өте төмен деңгейде қалып отыр —100 мың адамға шаққанда 0,3 %. Сонымен қатар өңірде қосымша ауруларды емдеу жұмыстары күшейтілуде: АИТВ-мен өмір сүретіндер арасында С гепатитін емдеумен қамту бір жыл ішінде төрт еседен астам өсті.
Негізгі топтар назарда. Өңірде осал топтар арасында алдын-алуға ерекше көңіл бөлінуде: секс-қызметкерлер, еркекпен жыныстық қатынас жасайтын ер адамдар, есірткі қолданатындар және транс-гендерлі тұлғалар. Бүгінде 271 адам байланысқа дейінгі алдын алу қабылдап жүр — ол АИТВ жұқтырудың алдын алуға мүмкіндік беретін дәрі.
Директордың айтуынша, мұндай нәтижелер денсаулық сақтау жүйесінің бірлескен жұмысы мен халықаралық стандарттарға сай терапияның арқасында мүмкін болды.
«Басты міндет — заманауи профилактика мен емдеу әдістеріне
халықтың барлық тобы үшін қолжетімділікті кеңейту. Бұл жағдайды бақылауда ұстап қана қоймай, ВИЧ таралуын 2030 жылға дейін тоқтату жөніндегі жаһандық мақсатқа жақындай түсуге мүмкіндік береді», — деп атап өтті ЖИТС орталығының директоры.
Самал Кеңшілікқызы
ШЖҚ «Алматы облыстық ЖИТС-ның алдын алу және оған қарсы күрес орталығы» КМК, ұйымдастыру-әдістемелік бөлім меңгерушісі
