Жылыту маусымына байланысты облыстық төтенше жағдайлар департаменті мен «Жастар рухы» жастар қанатының еріктілері бірігіп, Қонаев саяжайы тұрғындарының үйін аралап, өрт қауіпсіздігі ережелерін түсіндірді. Басты мақсат – өрттің алдын алып, оның әсерінен болатын адам шығынын болдырмау.
– Өткен жылы өрттен 13 адам зардап шегіп, өкінішке қарай, оның 10-ы қаза тапты. Алдыңғы жылы 20 адам өрттен болатын келеңсіз жағдайға тап болған. Бірақ соңғы бес жылда профилактикалық шаралардың арқасында тілсіз жаудың құрбаны болғандар саны азайып келеді. Өрт тұтануының 80 пайызы электр жабдықтарын дұрыс пайдаланбаудан болады. Жылыту маусымында пеш қолданатын үйлерге көбірек көңіл бөлеміз. Одан шығатын улы газдан бір отбасы толық қайтыс болған жағдайлар баршамызға мәлім. Әлеуметтік осал топтағы отбасыларға әкімдікпен біріге отырып, үйлеріне арнайы құрылғы орнатып, көмек көрсететін боламыз, – деді облыстық төтенше жағдайлар департаментінің мемлекеттік өрт бақылау басқармасының бастығы, азаматтық қорғау подполковнигі Арман Мәкенов.
Үйлерді аралау барысында ТЖД қызметкерлері қарапайым, бірақ аса маңызды қауіпсіздік ережелерін түсіндірді. Олар электр сымдарының жарамдылығын үнемі тексеріп отыру керегін, ұзақ уақыт қосулы тұрған құрылғыларды қараусыз қалдырмау қажеттігін ескертті. Пеш жағатын отбасыларға есікті ашық қалдырмай, түтін мұржаларын жиі тазалап тұру ұсынылды. Газ баллондарын пайдаланғанда да қауіпсіздік ережелерін қатаң сақтау қажеттігі, әрбір үйде улы газдан сақтайтын құрылғы болу тиістігі түсіндірілді. Қызметкерлердің айтуынша, өрт қауіпсіздігі – тек құтқарушылардың ғана емес, әрбір азаматтың ортақ жауапкершілігі.
Тұрғындар да бұл шараға ризашылығын білдірді. Сәрсенгүл Алланиязова мұндай іс-шараның пайдалы екенін айтып, қызметкерлердің ережелерді егжей-тегжейлі түсіндіргенін атап өтті. Оның сөзінше, жылыту маусымы қарсаңында сақтық шараларын қайта еске салу тұрғындар үшін өте маңызды.
Гүлзат БАЙҚОНЫСОВА
