Талғар медициналық колледжінде «Мемлекеттік рәміздер – егемендігіміздің мызғымас негізі» атты кездесу өтті. Шараны әлеуметтік тапсырыс аясында «Іле мұрагер» қоғамдық бірлестігі ұйымдастырды.
Қазақстан Республикасының Мемлекеттік рәміздерін қолданудың құқықтық және нормативтік тәртібін түсіндіру, сондай-ақ жастар арасында рәміздерге деген құрмет пен патриоттық сезімді қалыптастыру мақсатында ұйымдастырылған шараға ҚР Сауда және интеграция министрлігі «Техникалық реттеу және метрология комитетінің Алматы облысы бойынша департаменті» РММ-нің бас маманы, инспектор Дамир Отыншиев және Талғар аудандық ішкі саясат бөлімінің бас маманы Өркен Әбдібай қатысты. Олар Мемлекеттік рәміздер – Ту, Елтаңба және Гимннің мәніне, оларды дұрыс қолдану ережелеріне, рәміздер арқылы ел бірлігі мен ұлттық сана-сезімді арттырудың маңызына тоқталды.
Кездесу барысында қатысушылар белсенділік танытып, көкейлеріндегі сауалдарын жолдады. Бұл жастардың елдік мәселелерге бейжай қарамайтынын, азаматтық белсенділігінің жоғары екенін аңғартты. Мұндай іс-шаралар – өскелең ұрпақты елжандылыққа тәрбиелеудің, ұлттық құндылықтарды дәріптеудің маңызды құралы. Мемлекеттік рәміздерге құрмет көрсету – әрбір азаматтың парызы. Сол себепті мұндай кездесулердің мәні де, маңызы да ерекше.
Қымбат Құрманжанова,
«Іле мұрагер» қоғамдық бірлестігінің төрағасы
Талғар ауданы
