Қасиетті Қарадала топырағында дүбірлі той басталды. Ұйғыр ауданының 90 жылдығы бір аптаға созылып, түрлі мәдени, спорттық, салтанатты іс-шаралар мен көрмелер ұйымдастырылады. Мерейтойдың басты мақсаты – өңірдің тарихын, мәдениетін насихаттау, жерлестердің жетістіктерін дәріптеу және жас ұрпақты туған жерге деген сүйіспеншілікке баулу.
Мемлекет басшысы Қасым-Жомарт Тоқаев өз сөзінде: «Туған жерге туыңды тік» дейді халқымыз. Өте мағыналы өсиет. Жас ұрпақ бұл сөздің мән-мағынасына терең бойлауы қажет. Қазақстан – барша азаматтың ортақ Отаны, қастерлі мекені. Оның қай түкпірі де – біздің туған жеріміз. Жастар еліміздің барлық аймағын бірдей жақсы көріп, тұтас еліміздің дамуына үлес қосқаны абзал», – деген еді. Ел Президентінің «Туған жерге туыңды тік» бастамасы аясында өңірімізде көптеген жоба жүзеге асып келеді. Мерейтой аясында ауданға еліміздің әр саласында табысты еңбек етіп жүрген, Қарадаладан түлеп ұшқан азаматтар туған жерге атбасын бұрып, қуанышқа ортақтасады.
Осы ауқымды шаралар арқылы Қарадала жұртшылығы өз тарихына, мәдени мұрасына және туған жеріне деген құрметін көрсетіп қана қоймай, болашақ ұрпаққа ұлттық рухты, патриотизмді дәріптеуді мақсат етеді. Мерейтойдың басты идеясы – бірлік пен ынтымақты, туған жерге деген сүйіспеншілікті бойына сіңірген жаңа буын тәрбиелеу.
Мерейтойдың алғашқы күні білім мен ғылым саласына арналды. «Білімді ұрпақ – кемел келешектің кепілі» тақырыбында өткен пленарлық форум аясында ауданымыздан шыққан ғалымдар бас қосты. Әр салада еліміздің дамуына үлес қосып жүрген ғалымдар жас ұрпақ тәрбиесі мен ғылым саласының дамуындағы жасанды интеллектінің маңызы мен мәнін кеңінен түсіндірді. Келелі ой, сарапты пікірлер ортаға салынды.
Алдағы күндері «Руханият – ұлттың өзегі» тақырыбында мәдениет пен әдебиет күні, «Салауатты өмір – жарқын болашаққа нық қадам» тақырыбында спорт пен денсаулық күні, «Ауыл шаруашылығы – ел экономикасының өзегі» тақырыбында ауыл шаруашылығы мен кәсіпкерлер күні өтеді. Ауданның барлық саласындағы қол жеткен жетістіктер мен жарқын істердің қорытындысы соңғы күнгі «Бірлік пен даму» форумы аясында қорытындыланбақ. Осылайша тарихтың өзі таңбалаған тоқсан жылдықтың мерейіне апта бойы әр саланы қамтитын форумдар мен танымдық шаралар, концерттер мен кездесулер өткізілмек.
Шара аясында осы өңірден қанат қаққан жерлестеріміз ауданымызға келіп, өз үлесін қосуға және туған өлкесін жан-жақты қолдауды, ауданымыздың жарқын болашағына қызмет етуді қолға алмақ. Үйсінтаудың етегіндегі қасиетті Қарадаланың құшағындағы бірлік пен татулықтың мекеніне айналған ауданның 90 жылдығы осылайша рухани даму мен бірліктің тойы ретінде аталып өтеді.
Анар ДҮЙСЕНБАЙҚЫЗЫ
Ұйғыр ауданы
