Қарасай ауданына қарасты Іргелі ауылдық округіндегі «Асыл арман» тұрғын үй кешеніне жақын жерде орналасқан «Nomad International School» орта мектебінің аумағында азаматтық қорғаныс бағытында жаттығулар өткізілді. Жаттығудың басты мақсаты – төтенше жағдайлар туындаған жағдайда тиісті мекемелердің қызметін ұйымдастыру және халықты құтқару үшін қажетті іс-қимылдардың үйлесімділігін тексеру.
Бұл шара Қарасай ауданының әкімі Жасұлан Естеновтің тапсырмасы бойынша ұйымдастырылып, төтенше жағдайларда халықты қорғау және құтқару қызметінің дайындығын тексеруге бағытталды.
Жаттығуға Қарасай аудандық төтенше жағдайлар бөлімі мен Іргелі ауылдық округі әкімдігінің өкілдері қатысты. Іс-шара барысында апаттық-құтқару қызметінің дайындығы, эвакуация жұмысы, төтенше жағдайлар кезінде халықты қорғау мен жедел әрекет ету бойынша тексерулер өткізілді. Округ әкімі Арман Қамалбек жауапты мекемелердің жағдайымен танысып, олардың жұмысының үйлесімділігін жоғары бағалады.
Жаттығуға азаматтық қорғаныс саласының мамандары, жергілікті атқарушы органдардың өкілдері, бірнеше мекеменің қызметкерлері мен еріктілер қатысты. Сондай-ақ 15-ке жуық арнайы техника тартылды. Жаттығу барысында төтенше жағдайлар туындаған кездері атқарылатын іс-қимыл тәсілдері, жеке құрам мен арнайы техникалардың өзара әрекет ету әдістері сыналды.
Іргелі ауылдық округі әкімінің орынбасары Әркен Кенжебайдың айтуынша, халықтың қауіпсіздігін қамтамасыз ету мақсатында мұндай шаралар тұрақты түрде өткізілетін болады.
Қуат Қайранбаев
Қарасай ауданы
