Алматы облысының әкімі Марат Сұлтанғазиевтің Астанада еліміздің бүкіл журналистер қауымының алдында шығып сөйлеп, өңірдің өсіп-өркендеуі туралы айтқандары біраз жайтты аңғартады. Соңғы жылдарда еліміздегі оң өзгерістерді бәріміз де байқап отырмыз. Президент Қасым-Жомарт Тоқаевтың Жолдаулары көптеген ерекше бастамаларға толы десем, соны іс жүзіне асыруға келгенде әкімдерге жүктелер жауапкершілік пен сенім өте үлкен. Бұл тұрғыдан алғанда біздің облыстың әкімі үлкен жұмыстар жүргізіп жатқанын бұқаралық ақпарат құралдарынан көріп-біліп отырмыз. Алматы облысында кейінгі жылдары үлкен өзгерістер болып жатыр. Экономиканың әлеуетін арттыру үшін ірі жобалар қолға алынуда. Соның ішінде көптеген өндіріс орындары салынып, облысымыз елдегі алдыңғы қатарлы өңірлердің біріне айналды.
Біздің Жамбыл ауданында да өзгерістер жетерлік. Бұл жердің ерекшелігі ежелден ауыл шаруашылығына бейімделгендігінде. Сондықтан әсіресе аграрлы саладағы жаңалықтарға үнемі құлағымды түріп жүремін. Себебі ұзақ жыл өзім де ауыл шаруашылығымен айналысып, бірнеше ірі шаруашылықты басқарғандықтан, бұл жағын жақсы білемін. Мемлекет басшысы агроөнеркәсіптік кешеннің әлеуетін арттыру қажеттігін үнемі айтып келеді. Президенттің бұл салаға айырықша мән беруі еліміздегі азық-түлік қауіпсіздігінде ерекше орын алады. Мәселен, біздің Жамбыл ауданы мал өсіруге бейімделген. Төрт түліктің саны бойынша облыста көш бастап тұр. Жалпы төрт түлікті түгел қосып есептегенде, мал басы ауданда 1 жарым миллионның ар жақ-бер жағында. Енді сонымен қатар өнеркәсіпті өркендетуге де бет бұрылды. Менің ауылым Қазыбек бек бекетінде индустриялық аймақ құрылып, үлкен жұмыс басталып кетті. Мұнда облыс деңгейінде үлкен жұмыстар жүргізіліп жатқанын облыстық газет бетінен оқыдық. Зауыт-фабрикалар салынбақшы екен. Өндірістің дамуы бүкіл елдің өсіп-өркендеуіне үлкен серпін беретіні анық. Сондықтан осындай ірі шаруалар жалғаса берсе екен дейміз.
Сәтбек ЕРКІНБАЙҰЛЫ,
еңбек ардагері, «Парасат» орденінің иегері,
Алматы облысының және Жамбыл ауданының Құрметті азаматы
