«Зорлық-зомбылықсыз 16 күн» халықаралық акциясы біздің елімізде де аталып өтуде. Ол 25 қараша – Халықаралық әйелдерге қатысты зорлық-зомбылықты жою күніне орай басталып, 10 желтоқсанға дейін жалғасады.
Қарасай ауданы да бұл акциядан тыс қалмады. Акцияның мақсаты мен оның аясында жүргізілетін жұмыстар туралы Қарасай аудандық полиция басқармасы жанындағы отбасы және тұрмыстық зорлық-зомбылыққа қарсы күрес бөлімінің бастығы, полиция подполковнигі Элмира Есенбаева айтып берді.
– Акция аясында ең алдымен кең көлемде ақпараттық-насихаттау жұмыстары жүргізіледі, – деді полиция подполковнигі. – Бұл жұмыстар әйелдерге қатысты зорлық-зомбылықтың алдын алу және тоқтату, ана мен бала құқықтарын қорғау, сондай-ақ отбасын қоғамдағы негізгі құндылық ретінде нығайтуға бағытталған.
Оның айтуынша, әлемде әр үшінші әйел отбасы мен тұрмыстық зорлық-зомбылыққа ұшырайды. Қарасай ауданында да теперіш көріп жүрген нәзік жандылар баршылық. Олардың көпшілігімен тұрақты түрде алдын алу жұмысы жүргізілсе де, «Зорлық-зомбылықсыз16 күн» акциясы аясында бұл жұмыстар күшейтілуде.
– Бұл акция зорлық-зомбылыққа қарсы әлемдік ынтымақтастықты қолдауға, адамдардың, ұйымдар мен қауымдастықтардың күш-жігерін біріктіру арқылы әйелдер мен қыздарға қарсы зорлық-зомбылықты тоқтатуға бағытталған, – деп нақтылады біздің сұхбаттасушымыз. – Акцияның мақсаты – зорлық-зомбылықтың саналуан түрлері туралы ақпаратты арттыру, оның ішіне отбасылық-тұрмыстық, гендерлік, цифрлық зорлық-зомбылықты да қамту кіреді. Зорлық-зомбылықтың алдын алу және әр адамның қауіпсіз сезінетін ахуал қалыптастыру мақсатында іс-шаралар өткізіледі.
Эльмира Өмірзаққызы атап өткендей, акция аясында қиын жағдайға тап болған отбасылар мен ішкі істер органдарында есепте тұрған адамдар тексеріліп, тұрмыстық зорлық-зомбылыққа қатысты құқықбұзушылықтар анықталған жағдайда тиісті шаралар қабылданады. Сонымен қатар, аудандық отбасына қолдау көрсету орталығымен, үкіметтік емес ұйымдармен бірлескен жұмыс жүргізілуде.
Эльмира Өмірзаққызы өз сөзінде Қарасай ауданының тұрғындарын әлімжеттілікке бейжай қарамауға, зорлық-зомбылық құрбаны болып жүрген жандарға акция кезінде ғана емес, күнделікті өмірде де қолдау көрсетуге шақырды. Сонымен бірге 2009 жылдан бері елімізде қиын жағдайға түскен балаларға жедел құқықтық және психологиялық көмек көрсету үшін тәулік бойы «150» сенім телефоны жұмыс істейді. Бұдан бөлек, Қазақстан Республикасындағы бала құқықтары бойынша уәкілдің call-centre «111» телефоны да тәулік бойы қызмет атқарады.
Қуат Қайранбаев
Қарасай ауданы
