Алматы облысында арнайы салық режимінің мөлшерлемесін төмендету мәселесі бойынша нақты шешімдер қабылданды. Бұл нәтижеге мәслихаттардағы «AMANAT» партиясы фракциясының бастамасы және жүйелі жұмысы арқасында қол жеткізілді.
Өңірдің бірнеше ауданында өткен мәслихат сессияларында кәсіпкерлердің салықтық жүктемесін азайту мәселесі қаралып, қолдау тапты. Нәтижесінде Жамбыл, Іле, Қарасай аудандарында және Қонаев қаласында ставка 4%-дан 2%-ға дейін төмендеді. Ал Еңбекшіқазақ, Талғар және Ұйғыр аудандарында мөлшерлеме 4%-дан 3%-ға азайтылды.
«AMANAT» фракциясы бұл мәселені бірнеше ай бойы көтеріп, кәсіпкерлермен кездесулер ұйымдастырып, олардың ұсыныстарын талдап, салықтық қысымды төмендету қажеттігін мәслихаттарға жүйелі түрде жеткізіп келген. Депутаттар бастаманы қолдап, тиісті шешім қабылдады.
Жаңа мөлшерлемелер 2026 жылғы 1 қаңтардан бастап күшіне енеді. Сарапшылардың пікірінше, бұл өзгеріс шағын және микробизнес субъектілерінің шығындарын азайтып, айналым қаражатын арттыруға мүмкіндік береді.
«AMANAT» партиясының өкілдері аталған шешім өңірдегі кәсіпкерлікті қолдауға, бизнес үшін қолайлы жағдай жасауға және экономикалық белсенділікті арттыруға бағытталғанын атап өтті. Партия бұл жұмысты басқа өңірлерде де жалғастыруға ниетті.
