Қарасай ауданы Шамалған ауылында «RUKH» атты психологиялық орталық жұмыс істейді. Онда ішімдікке, есірткіге және құмар ойынға салынған адамдарға қолұшын созады. Орталықтың негізін қалаушы Ілияс Нағұмановтың айтуынша, қазіргі уақытта мұнда 10 адам оңалтудан өтіп жатыр. Оларға 15 қызметкер көмек көрсетеді.
– Адамдар мұнда сенімдерінен айырылған күйде келеді, – деді Ілияс Кенжеболатұлы. – Біртіндеп олар толыққанды өмірге қайта оралады, әлемді басқа қырынан көріп, болмыстың мәнін түсіне бастайды. Оларға психотерапевтік көмек көрсету бойынша үлкен жұмыс жүргізіледі. Себебі әртүрлі өмірлік жағдай, оның ішінде бала кезіндегі жан жарақаты, ата-анасының ажырасуы немесе дүниеден өтуі сияқты жағдайлар көптеген адамды өмірлік сынақпен күресуге дәрменсіз етіп, алкоголь немесе есірткі тұтынуға әкеп соқтырады. Ал кейбірі шынайы өмірден қашу үшін құмар ойынға қызығушылық танытады. Өкінішке қарай, біздің орталыққа жүйке жүйесі әбден асқынған кезде келеді. Бірақ біз барынша көмектесуге тырысамыз.
Ілияс Кенжеболатұлы бес жыл бұрын дәл осындай күйді өз басынан кешірген екен. Енді ол басқаларға көмек көрсету үшін осындай сауықтыру орнын ашқан. Оның командасы жас, жігерлі, спортшы, сауатты және сыпайы адамдардан жасақталған. Орталықтың жұмысына тікелей басшылық жасайтын Мадияр Бимұханов болса, мотивация бөліміне Елдар Ермек жетекшілік етеді. Айта кетерлігі, Елдар Жұмабекұлы мектепті «Алтын белгімен» бітіріп, спортпен, әсіресе күрестің джиу-джитсу түрімен айналысқан. Орталықта оның көптеген кубоктары мен медальдары көз тартады. Мұның өзі емделушілерге жігер беретіні анық.
Оңалту бағдарламасы 12 негізгі қадамнан тұрады, олардың әрбірі қалыпты өмірге оралуға көмектеседі. Алғашқы және ең маңызды қадам – тәуелділікті мойындап, онымен жалғыз күресу мүмкін еместігін түсіну.
– Бұл қадам өте қиын әрі маңызды, – деп санайды Ілияс Кенжеболатұлы. – Әрбір ауруды емдеу диагноз қоюдан басталса, біздің орталықта да адамның өзі тәуелділіктің бар екенін түсініп, мойындауы өте маңызды. Ішімдікке салынғандардың көпшілігі өздерінің проблемасын мойындаудан бас тартады. Біреуінің ар-намысы жібермейді, ал басқалары қоғамның пікіріне тәуелді. Бірақ бір күні адам үмітсіздікке түскенде психологиялық көмек көрсету орталықтарына жүгінеді. Уақытылы көмек алу өте маңызды. Көптеген отбасы мәселені жасыруға тырысады. Бірақ ақыр соңында ауруы ашылып, ауыр зардаптарға әкеліп жатады.
Қалған 11 қадам өз-өзін қайта бағалауға, әлсіздігін түсініп, Жаратушының құдіретті күшін сезінуге негізделген. Ең маңыздысы, орталықта барлық жағдай жасалған. Бөлмелер таза, әдемі, жайлы, қалыптасқан тәртіп бар. Екі қабатты ғимараттағы әр бөлмеге 5-6 адамға дейін орын бөлінген. Бөлмелердің атаулары да қызық – «Амстердам», «Лос-Анджелес», «Раккун-Сити». Бұл атауларды емделіп жүрген жандар өздері ойлап тапқан. Орталықтың фойесінде функционалдық міндеттер көрсетілген стендтер, даналық сөздер жазылған. Осының бәрі адамның жаңаша қалыптасуына бағыттайды. Жауапкершіліктен қашпауға, батыл және сенімді өмір сүруге үйретеді.
Ең маңызды аспектінің бірі – еңбек терапиясы. Ем қабылдаушының өз міндеті бар, олар мезгіл-мезгіл ауысып отырады. Атап айтқанда, тамақ дайындауды, аула тазалауды, орталықтағы өсімдіктерге күтім жасауды және тағы басқа жұмыстарды атқарады. Оңалтудың негізгі кезеңі төрт айдан тұрады. Толық курс алғандарға бір жыл бойы орталықта тәжірибеден өтуге және кеңесші болуға ұсыныс жасалады.
Айтқанымыздай, көптеген жас мұнда өмір мен өзіне деген сенімінен айрылып, күйзеліп, жандүниесі мұздаған күйде келеді. Бірақ сауатты құрылған сауықтыру шараларының арқасында олардың бойларына біртіндеп жылу тарап, емделіп, тәуелділіктен босап шығады. Әлемді жарқын түстермен көруді бастайды және өмірді бағалайды.
Қуат ҚАЙРАНБАЕВ
Қарасай ауданы
