Алматы облысының әкімдігі Алматы қаласының балансынан өңір меншігіне берілген ескі автобустарға қатысты түсініктеме берді.
Кеше «Алматыэлектротранс» компаниясы Алматы қаласында жүріліп, тозығы жеткен 300 автобустың қала әкімдігінің балансынан Алматы облысының меншігіне өтетінін хабарлаған еді. Автобустар Алматы облысы мен қала маңындағы аумақтарды дамыту және Алматы қаласының экологиялық ахуалын жақсарту мақсатында берілмек.
Өңір әкімдігінің мәліметінше, дизельмен жүретін бұл автобустарды жөндеу қажет және олар ішінара бөлшектелген.
«Алматы облысының әкімдігі қазіргі уақытта ақауларды анықтау, сондай-ақ автобустарды қалпына келтіру, бағалау жұмыстарын жүргізіп жатыр. Облыс әкімдігі жөндеуге келетін көліктерді ретке келтіріп, бағдарларға шығарады. Айта кететін жайт, біз кейбір көліктерді жөндеп алдық және олар қазір бірнеше елді мекен арасында қатынап жүр. Біз жаңа бағыттарды маусым айының ортасында таныстырдық», – деп хабарлады облыс әкімдігінің баспасөз қызметі.
Әкімдіктің мәліметінше, мамандар қалпына келтіруге болатын көліктерді алып кетіп жатыр. Олар күрделі жөндеуден кейін пайдалануға берілмек.
