Қонаев қаласындағы Мәдениет үйінде өңір мәдениеті үшін мәні бөлек жаңа жоба көпшілікке таныстырылды. Облыс әкімі Марат Сұлтанғазиевтің бастамасы және тікелей қолдауымен құрылған «Алатау VOICE» вокалдық квартетінің «Алатауым – айбыным!» атты ресми тұсаукесер концерті өтті.
Салтанатты шараға облыстық мәдениет, архивтер және құжаттама басқармасы, халық шығармашылығы орталығы және Райымбек ауданының әкімдігі ұйытқы болды. Кештің негізгі мақсаты – жаңа кәсіби ұжымның шығармашылық бағытын таныстыру, өңірдің мәдени әлеуетін көрсету және жергілікті таланттарды қолдау.
Концерттік бағдарлама үш бөлімнен тұрды. Әр бөлім тыңдарманға орындалған шығармаларды түйсініп, саралауға мүмкіндік беретін шағын үзілістермен жалғасты. Кеш атауы ұжым репертуарының мазмұнын айқындап, туған өлкенің табиғаты, тарихы мен рухани болмысы басты идея ретінде көрініс тапты.
Облыс әкімі Марат Елеусізұлының кешке арнайы қатысуы бұл бастаманың бір реттік жоба емес, өңір мәдениетін дамытуға бағытталған ұзақ мерзімді, жүйелі жұмыс екенін аңғартты. Әкімдік қолдауымен кәсіби вокалдық ұжымның құрылуы аймақта шығармашылық ортаға жасалып отырған нақты қадам ретінде бағаланды.
«Алатау VOICE» алдағы уақытта тек концерттермен шектелмей, жаңа шығармалар жазу, ірі мәдени іс-шараларға қатысу және облыс мәдениетін республика көлемінде кеңінен насихаттауды мақсат етеді. Бұл бағыттағы жұмыстар ұжымның өңірдің мәдени келбетін қалыптастыруға қосар үлесін айқындай түспек.
Кеш соңында көрермендер өнерпаздарға ұзақ қол соғып, жаңа шығармашылық ұжымға деген ыстық ықыласын білдірді. Облыс және қала басшылығы тарапынан сыйға тартылған ықылас гүлі жас орындаушыларға берілген сенімнің белгісі ретінде қабылданды.
Қонаевта өткен тұсаукесер концерт «Алатау VOICE» ұжымының шығармашылық жолы сенімді басталғанын көрсетіп, мәдени ортада табысты дамуына жол ашты.
Құралбек СӘБИТОВ
Қонаев қаласы
