Шеңгелді ауылдық округінің аумағында 1200 бас ірі қара малға арналған сүт-тауарлы фермасы бой көтереді. Құрылыс жұмыстарын бастауға 1955 гектар жер телімі бөлінді. Қазіргі таңда оның 700 гектарына мал азығы дақылдарын егу үшін жер дайындалып жатыр. Мұнда тамшылатып және жаңбырлатып суғару технологиясы қолданылмақ.
Инвестициялық жоба 2030 жылға дейін жүзеге асады деп күтілуде. Тартылатын инвестиция көлемі 15 млрд. теңгеден асады. Жоба жүзеге асса, 100 жаңа жұмыс орны құрылады. Ферманың жылдық қуаты 13 млн литр сүт өндіруге жеткілікті болмақ.
Жоба аясында екі негізгі технологиялық үдеріс көзделген. Бірінші үдеріс мал азығы дақылдарын өсіру болса, екіншісі – тауарлы сүт өндіру.
Қонаев қаласының әкімі Асхат Бердіханов халыққа инвестициялық жобаны таныстыру мақсатында жиын өткізді.
«Өндіріс орындарын ашу, халықты жұмыспен қамту – Қонаев қаласы әкімдігінің басты бағдарларының бірі. Зауыт салынуын жан-жақты қолдауымыз қажет. Кәсіпорынның бой көтеруі ауыл-аймақтардағы жұртшылықтың әл-ауқатына, қала экономикасына тікелей әсер етеді. Алдағы уақытта қалада 40-тан астам инвестициялық жоба жүзеге аспақ» – деді шаһар басшысы.
Айта кетейік, былтыр Қонаев қаласына 100 млрд. теңгеден астам инвестиция тартылды.
